Cwngfuj Gunghcoz Baugau
——2018 Nienz 3 Nyied 5 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daih’it
Gozvuyen cungjlij Lij Gwzgyangz
Gak boux daibyauj:
Seizneix, gou daibyauj Gozvuyen, yiengq daihhoih baugau gij hongsaeh cwngfuj haj bi gvaqbae neix, doiq gij hongsaeh bineix daezok genyi, cingj saemjlwnh, caemhcaiq cingj Daengx Guek Cwnghez gak boux veijyenz daezok yigen.
It、Dauqngeix Gij Hongsaeh Haj Bi Gvaqbae Neix
Gaiq Cibngeih Daengx Guek Yinzminz Daibyauj Daihhoih Baez Hoih Daih’it doxdaeuj haj bi neix, dwg haj bi gig mbouj bingzciengz ndaw bouhloh hwngfat guek raeuz. Mienhdoiq gij hingzseiq ndawguek rogguek doxsan doxgeuj youh gig fukcab, aen Dangjcunghyangh aeu Siz Ginbingz dungzci guh gyangsim haenx comzgiet daiqlingx daengx guek gak cuz yinzminz haenqheiq baenaj, cingjdaej suenqveh doicaenh aen cungjdaej baijbouh “haj yiengh gyoeb baenz cingjdaej”, doxdaengh doicaenh aen canloz baijbouh “seiq aen cienzmienh”, gaijgwz hailangh caeuq cauhlaeb sevei cujyi yendaiva cienzmienh hai ok geizseiq moq. Cibgouj Daih aen Dangj dinghlaeb le gij lizsij diegvih Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, ceiqdingh le aen doz giva hungmbwk caeuq aen ganghlingj hengzdoengh guhcaez gij yinvu cienzmienh hwnqbaenz aenbiengz siujgangh、roengzrengz ceng’aeu yiengh sevei cujyi miz gij daegsaek Cungguek seizdaih moq ndaej dabdaengz muzdiz yawhgeiz, miz yienhsaed eiqngeih hungnaek caeuq lizsij eiqngeih gyaelaeg. Gak dieg gak bouhmonz mboujduenh demgiengz cwngci eiqsik、daihbuenz eiqsik、gyangsim eiqsik、gaenhwnj eiqsik, haeujlaeg gvancez doeksaed hwngfat leixniemh moq,“Cibngeih Haj” Gveihva guhbaenz caezcup,“Cibsam Haj”Gveihva swnhleih hengzguh, ginghci sevei hwngfat aeundaej cingzcik hab geiq haeuj lizsij、fatseng bienqvaq hab geiq haeuj lizsij.
Haj bi daeuj, ginghci saedlig yathwnj mbaek moq. Gij swnghcanj cungjciz ndawguek daj 54 fanh ik maenz gyalai daengz 82.7 fanh ik maenz, moix bi bingzyaenz demmaj 7.1%, ciemq seiqgyaiq ginghci faenhliengh daj 11.4% hwnj daengz 15% baedauq, doiq seiqgyaiq ginghci demmaj gunghawj cingzsoq mauhgvaq 30%. Caizcwng souhaeuj daj 11.7 fanh ik maenz gyalai daengz 17.3 fanh ik maenz. Gij gyaqcienz siuyungh gihminz moix bi bingzyaenz hwnjsang 1.9%, baujciz suijbingz haemqdaemq. Ndawsingz saen demgya couhnieb 6600 fanh vunz doxhwnj, aen guek hung 13 ik lai vunz raeuz ndaej guhdaengz couhnieb haemq cungfaen.
Haj bi daeuj, ginghci gapgyaq miz ok gaijbienq hungnaek. Siuyungh gunghawj cingzsoq daj 54.9% hwnj daengz 58.8%, hangznieb fugsaeh soj ciemq faenhliengh daj 45.3% hwnj daengz 51.6%, bienqbaenz gij rengzgoek doidoengh coicaenh ginghci demmaj. Aen hangznieb dajcauh gisuz sang de moix bi bingzyaenz demmaj 11.7%. Gij naengzlig swnghcanj haeuxgwn dabdaengz 1.2 fanh ik gaen. Cwngzcinva beijlwd daj 52.6% hwnj daengz 58.5%, 8000 lai fanh vunz daj nungzyez cienj okdaeuj haenx bienqbaenz gihminz hawsingz.
Haj bi daeuj, cauhmoq doidoengh hwngfat cwngzgoj hungcoek. Daengx biengz damqgouz haifat douzhaeuj moix bi bingzyaenz demmaj 11%, gveihmoz yat daengz seiqgyaiq vih daihngeih. Gohgi cinbu gunghawj cingzsoq daj 52.2% daezsang daengz 57.5%.Mboujduenh nyoenx ok cwngzgoj cauhmoq hungnaek, lumjbaenz dap vunz mbin mbwn、haij laeg damqrau、liengswj doengsaenq、feihgih hungloet daengj. Aen vangjloz gauhsuz dezlu、hongsaeh seng’eiq gwnzvangj、senjdoengh ceihawj、gij ginghci caemhyungh daengj dazyinx aen bienqvaq byaijyiengq seiqgyaiq. “Hulenzvangj ＋”gvangqlangh yungzhaeuj gak hangz gak nieb bae. Vunzlai cauhnieb、vunzlai cauhmoq hwngfat hoenghhwd, moix ngoenz bingzyaenz laeb giyez moq daj 5 cien lai hoh gyalai daengz 1 fanh 6 cien lai hoh. Gij rengz doidoengh moq hwnghwnj gig vaiq, cingqcaih gaijlaeb aen gapgyaq geksik ginghci demmaj、laegdaeuq gaijbienq gij fuengsik swnghcanj swnghhoz, bienqbaenz Cungguek cauhmoq hwngfat aen geiqhauh moq ndeu.
Haj bi daeuj, gaijgwz hailangh yamq ok yamqdin hungnaek. Gaijgwz ndaej cienzmienh fatrengz、cungbyoengq lai diemj、doicaenh haeuj laeg bae, gij gaijgwz aen lingjyiz youqgaenj caeuq aen hothoh ceiq youqgaenj de ndaej cungbyoengq hwngfat baenaj. Cinggemj gihgou cuengqroengz gienzlig、cuengq guenj giethab、coisawj fugsaeh bienq ndei daengj gaijgwz doidoengh cwngfuj ciznwngz fatseng cienjbienq laegdaeuq, gij rengzhoengh hawciengz caeuq gij naengzlig dajcauh ndaw biengz gya ak yienhda. Hwnqguh“it rangh it loh”cingzyauq yienhda, doiq rog gaicawx caeuq yungh swhbwnj guekrog gapgyaq bienq ndei、gveihmoz naengh onj baiz gonq seiqgyaiq.
Haj bi daeuj, gij gwndaenj lwgminz laebdaeb gaijndei. Duetgungz gunggeng ndaej onjmaenh hwngfat baenaj, gemjnoix gij vunz gungzhoj de 6800 lai fanh. Senj dieg an’gya banggungz 830 fanh vunz, gij beijlwd vunzsoq bouxhoj ciemq cungjvunzsoq daj 10.2% doekdaemq daengz 3.1%.Gihminz souhaeuj moix bi bingzyaenz demmaj 7.4%、vaiq gvaq ginghci demmaj, cauxbaenz gwnz seiqgyaiq gyoengq vunz souhaeuj gaepgyang ceiq lai de. Gij vunzsoq baezsoq ok gyaiq bae youz daj 8300 fanh gyalai daengz 1 ik 3 cien lai fanh. Aen saehnieb gyauyuz cienzmienh hwngfat. 9 ik lai vunz ndaej daengz ndawbiengz ciengxlaux baujyiemj, 13.5 ik vunz ndaej daengz gihbwnj ywbingh baujyiemj, san baenz le fan vangx ndawbiengz baujcang gwnz seiqgyaiq ceiq hung. Daihgaiq moix vunz bingzyaenz ndaej gyaeu dabdaengz 76.5 bi. Dieg ranzdiengz gaijcauh ranzyouq 2600 lai fanh dauq, lajmbanj gaijcauh ranzvaih 1700 lai fanh hoh, baenz ik vunz vuenheij buen haeuj ranz moq.
Haj bi daeuj, yiengh swnghdai vanzging yaez de cugbouh bienq ndei. Ceiqdingh hengzguh sam aen“cib diuz” fuengzceih daihheiq、raemx、doemnamh uqlah caemhcaiq aeundaej cingzyauq maenhsaed. Danhvei ndawguek swnghcanj cungjciz siuyungh nwngzyenz、siuyungh raemx bingzyaenz doekdaemq 20% doxhwnj, gij huq cujyau uqlah de baizcuengq soqliengh lienzdaemh doekdaemq, gij ngoenzsoq uqlah youqgaenj cungdenj hawsingz de gemjnoix dingz ndeu, ndoengfaex gya gvangq 1.63 ik moux, diegdeih bienq diegsa moix bi bingzyaenz gemjnoix ca mbouj geij 2000 bingzfueng goengleix, yiengh uqlah bienq noix、dieg heu bienq lai hawj vunz sim’angq.
Bi 2017 ngamqngamq gvaqbae neix, gij cujyau muzbyauh yinvu ginghci sevei hwngfat cienzmienh guhbaenz caemhcaiq ndei gvaq yawhgeiz. Gij swnghcanj cungjciz ndawguek demmaj 6.9%, gij souhaeuj gihminz demmaj 7.3%, demmaj cungj loq vaiq gvaq bigonq; ndaw singz gij vunz saen couhnieb de 1351 fanh vunz, saetnieb beijlwd dwg lai bi daeuj ceiq daemq; gunghyez demmaj dauq raen gyavaiq, giyez leihyinh demmaj 21%; caizcwng souhaeuj demmaj 7.4%, niujcienj le aen seiqdaeuz demmaj bienq menh de; cingouj cuzgouj demmaj 14.2%, saedsaeh sawjyungh swhbwnj guekrog 1363 ik meijyenz、dwg gwnz lizsij ceiq sang. Ginghci hwngfat yienh’ok aen geizseiq ndei demmaj caeuq caetliengh、gapgyaq、yauqik doxbouj doxik. Neix dwg haj bi daeuj baenzroix cwngcwz hungnaek coi baenz, gak fuengmienh mboujduenh roengzrengz、baez di guh ndei cij ndaej daeuj.
Haj bi gvaqbae neix aeundaej gij cingzcik cienzfueng’vih、miz haicauh singqcaet de, fatseng gij bienqvaq haeuj caengz laeg、daengz goekgaen haenx, caiq hawj seiqgyaiq cimyawj baez ndeu, daengx guek gak cuz yinzminz gyaboix roxnyinh sim’angq caeuq miznaj.
Haj bi daeuj, raeuz nyinhcaen gvancez gij gezcwz baijbouh aen Dangjcunghyangh aeu Siz Ginbingz dungzci guh gyangsim, cujyau guh le gij hongsaeh lajneix.
（It）Genhciz aen diuhgoek guhhong youq ndaw onjmaenh gouz baenaj, yunghrengz cauhmoq caeuq guhndei hungzgvanh diuzgung, ginghci yinhhengz baujciz youq ndaw duenh hableix、saedyienh onjdingh yiengq ndei. Geij bi neix, seiqgyaiq ginghci hoizfuk mbouj rengz, gozci ginhyungz hawciengz fwt hwnj fwt roengz, baujhu cujyi dauq hwng yienhda. Ndaw ginghci hwngfat guek raeuz gij vwndiz gapgyaq cauhbaenz caeuq mauzdun caengz laeg de doedyienh, ginghci gyodroengz atlig laebdaeb gyadaih, genj neix genj haenx cungj hojguh. Naj doiq doengh gij cingzgvang neix, raeuz youq gwnz canloz mbouj gaenj mbouj muengz, genhciz mbouj bae guh yiengh gikcoi haenqrem lumj “hai raemx hung dwk reihnaz”, cix dwg hab’wngq gaemdawz yiengh cingqciengz moq bae dazyinx ginghci hwngfat, cingjdaej suenqveh onj demmaj、coi gaijgwz、diuz gapgyaq、ik beksingq、fuengz fungyiemj, mboujduenh cauhmoq caeuq laebndei hungzgvanh diuzgung, laebdingh gij roennaemj caeuq fuengsik gihgenh diuzgung, gyagiengz dinghyiengq diuzgung、yawj seiz diuzgung、dawzcinj diuzgung.Mingzbeg giengzdiuh cijaeu ginghci yinhhengz youq ndaw duenh hableix, couhnieb ndaej demgya、souhaeuj ndaej demmaj、vanzging ndaej gaijndei, couh gyonjcomz cinglig bae coi gaijgwz、diuz gapgyaq、dem rengznyoengx. Yungh gij banhfap geiq ik dangqnaj youh ik gyaeraez, comzrengz doicaenh gaijgwz gij gapgyaq mbiengj gunghawj, habdoh gya’gvangq cungjdaej aeuyungh, doidoengh youq caengzmbaek engq sang youq ndaw bienqvaq guhdaengz gunghawj aeuyungh doxdaengh. Ginggvaq gwnhoj roengzrengz, raeuz dingj gvaq le gij atlig ginghci gyodroengz、baexmienx le gaenjgip gyangq roengzdaeuj, baujciz ginghci demmaj ndaej haemq vaiq, coicaenh le gapgyaq bienq ndei, aen giekdaej ginghci ciengzgeiz byaij ndei mboujduenh gyamaenh caeuq hwngfat.
Genhciz saedhengz aen caizcwng cwngcwz gaenxmaenx caeuq aen hobi cwngcwz onjdangq de. Mienhdoiq caizcwng soucei mauzdun haemq daih, ngeixnaemj“cuengq raemx ciengx bya”、gya ak rengzlaeng, guek raeuz sien daih fukdoh gemj gvaeh gyangq feiq gonq. Faen bouhloh cienzmienh haiguh yingzyezsui gaij cwnghcizsui, gietsat duenh lizsij cwngsou yingzyezsui 66 bi, gyoebsuenq gemj gvaeh mauhgvaq 2 fanh ik maenz, caiq gya yungh gij guhfap gemj sou cungj cienzgvaeh giyez iq saeq、cingleix gak cungj soucienz daengj, itgungh gemjmbaeu diuzrap hawciengz cawjdaej 3 fanh lai ik maenz. Gyagiengz guenjleix gij ngaenzcaiq deihfueng cwngfuj, saedhengz deihfueng cwngfuj vuenh ngaenzcaiq baenz caigen, gyangqdaemq rapdawz leihsik 1.2 fanh ik maenz.Diuzcingj aen gapgyaq caizcwng ceiok, yungh ndei gij cienzngaenz sanq youq gwnzbiengz, baujcang gihbwnj minzswngh caeuq cungdenj hanghmoeg. Aen beijlwd caizcwng ceiok lai gvaq souhaeuj itcig hanh youq baihndaw 3％. Hobi cwngcwz baujciz mbouj soeng mbouj gaenj, gvangjyi hobi M2 demmaj byaijyiengq roengzdaemq, aen soqliengh sindai caeuq sevei yungzswh demmaj habdoh. Yungh gij cwngcwz miz cabied bae guh dinghyiengq gyangqdaemq aen beijlwd cienzbwh、cienhangh caiq daigvanj daengj, gyalai daemxcengj aen lingjyiz cungdenj caeuq hothoh mbangnyieg, daigvanj hawj giyez iq saeq demmaj vaiq gvaq gak hangh daigvanj bingzyaenz demmaj. Gaijgwz laebndei aen gihci guhbaenz hawj hawciengz dingh veiqlwd, baujciz yinzminzbi veiqlwd daihdaej onjdingh, cwkrom vaivei daj doek bienq hwnj. Dojdangq wngdoiq“cienz noix”daengj ginhyungz hawciengz fwt hwnj fwt roengz, gveihfan aen cizsi ginhyungz hawciengz, fuengzre vaqgej gij fungyiemj ndaw lingjyiz cungdenj, souj maenh diuz daejsienq mbouj ok gij fungyiemj baenz roix, henhoh le guekgya ginghci ginhyungz ancienz.
（Ngeih）Genhciz aeu gaijgwz gij gapgyaq mbiengj gunghawj guh cawjsienq, comzrengz ganq hung gij rengz doidoengh moq, ginghci gapgyaq ndaej gyavaiq bienqndei swnggaep. Gaenjndaet baenghgauq gaijgwz bae buqgej gij nanzdaez ginghci hwngfat caeuq gapgyaq mbouj doxdaengh, yungh rengz hung bae hwngfat gij canjnieb ngamq hwng, gaijcauh daezswng aen canjnieb cienzdoengj, daezsang gij caetliengh caeuq yauqlwd aen dijhi gunghawj.
Maedsaed doicaenh“sam gemj it gyangq it bouj”. Haj bi daeuj, youq gwnz giekdaej raengcawz gij swnghcanj naengzlig doeklaeng de lumjbaenz suijniz、bingzbanj bohliz daengj, aeu gangdiet、meizdan daengj hangznieb guh cungdenj, roengz rengz hung bae siugemj gij swnghcanj naengzlig lwyawz de, cunghyangh caizcwng anbaiz 1000 ik maenz cienhangh dajciengj boujdiep bae daemxcengj, yungh bae anceiq faenliuz cizgungh. Doiq ok gangdiet swnghcanj naengzlig 1.7 ik dunh doxhwnj、meizdan swnghcanj naengzlig 8 ik dunh, anceiq faenliuz le 110 lai fanh cizgungh. Yawj singz dingh geiq faenloih dazyinx, gij ranzyouq sanghbinj daenzcang hawsingz sam seiq sienq gemjnoix yienhda, aen seiqdaeuz ranzyouq hwnjgyaq aen hawsingz vunz caenx youq de ndaej daengz gaemhanh.Gaenxmaenx onjdangq bae gemjnoix dawzcaiq, gaemhanh ngaenzcaiq soqliengh, demgya gujgenz yungzswh, aen beijlwd swhcanj aemq caiq gunghyez giyez lienzdaemh doekdaemq, aen beijlwd hungzgvanh diuzgung hwnjsang fukdoh sou gaenj yienhda、seiqdaeuz cungjdaej onjdingh. Lai fap caez guh gyangq cingzbonj, gemjnoix cwngfujsing gihginh hanghmoeg 30％, siugemj doengh gij hanghmoeg soucienz nangqdaengz giyez youz cunghyangh cwngfuj ndalaeb haenx 60％doxhwnj, youq ndaw duenh he gyangqdaemq gij beijlaeh gyau“haj yiemj it gim”, doidoengh gyangqdaemq gij cingzbonj yungh nwngzyenz、yinh huq、densin daengj. Doedyienh cungdenj gya rengz bouj giz mbangnyieg de.
Gyavaiq hawj saen gaeuq rengz doidoengh hwngfat guh ciepswnj cienjvuenh. Haeujlaeg mbeguh“vangjdoxlienz ＋ ”hengzdoengh, saedhengz bauyungz siujsim gamguenj, doidoengh lailai bae yungh daihsoqgawq、yinzgeiqsuenq、vangjdoxlienz, canjnieb ngamq hwng hwngfat hoenghhwd, aen cienzdoengj canjnieb ndaej daj goekgaen bae gaijlaeb. Saedhengz“Cungguek Dajcauh 2025”, doidoengh hwnqguh aen gunghcwngz hungnaek lumjbaenz gyamaenh goekdaej gunghyez、cinwngz dajcauh、loegsaek dajcauh daengj, gij hangznieb dajcauh senhcin de hwngfat vaiqdangq. Fatbouh gij guhfap gaijgwz hwngfat hangznieb fugsaeh yienhdaih, gij ginghyingz yienghsik moq vunqsik moq hangznieb fugsaeh hwnghwnj fwdfwd, coicaenh le gak hangznieb yungzhab swnggaep. Haeujlaeg gaijgwz gij gapgyaq mbiengj gunghawj nungzyez, gij ginghyingz cawjdaej yiengh moq nyoenxok buek dem buek, hangz dajndaem habdoh gveihmoz ginghyingz de soj ciemq faenhliengh daj 30％ hwnj daengz 40％ doxhwnj. Yungh banhfap hawj doengh boux souhaeuj cungdaengj、souhaeuj haemq daemq de demlai souhaeuj, doidoengh yiengh siuyungh cienzdoengj de daez hwnj mbaek sang、yiengh siuyungh saen hwng de hwnghwnj foedfoed, gij soqngeg gwnz vangj gailingz moix bi bingzyaenz demmaj 30％ doxhwnj, aen cungjngeg siuhfeibinj gailingz ndawbiengz bingzyaenz moix bi demmaj 11.3％. Gaijndei aen gapgyaq douzswh, gikcoi ndawbiengz douzswh, fazveih gij cozyung doidoengh cwngfuj douzswh, dazyinx cienzngaenz lai douzhaeuj ndaw lingjyiz gyamaenh goekdaej、demgya rengzlaeng、ikleih lwgminz bae. Gij roenloh gauhsuz dezlu doeng hojceh daj 9000 lai goengleix demgya daengz 2 fanh 5 cien lai goengleix、ciemq seiqgyaiq sam faenh cih ngeih, roenloh gauhsuz daj 9.6 fanh goengleix demgya daengz 13.6 fanh goengleix, ngamq guh ngamq gaij goengloh lajmbanj 127 fanh goengleix, saen hwnq minzhangz gihcangz 46 aen, gaenq haigoeng gij suijli gunghcwngz hungnaek de 122 hangh, guhbaenz lwnz moq gaijcauh denvangj lajmbanj, guhbaenz aen yizdung gvanhdaivangj gwnz seiqgyaiq ceiq hung. Haj bi daeuj, hwngfat rengz doidoengh moq hungcoek vaiqdangq, ginghci demmaj guhbaenz daj cujyau baengh douzswh、baengh cuzgouj daeuj ragdoengh, cienj haeuj baengh siuyungh、douzswh、cuzgouj caez daeuj ragdoengh, daj cujyau baengh canjnieb daihngeih daeuj daiqdoengh cienj haeuj baengh sam aen canjnieb doengzcaez daiqdoengh. Neix dwg baez gaenbonj gaijbienq gapgyaq hungnaek raeuz lai bi cungj muengh guhbaenz hoeng cix guh mbouj baenz ndeu.
Yaek doicaenh gaijgwz gij gapgyaq mbiengj gunghawj, bietdingh aeu buqcawz cungj gazngaih hawciengz gietdingh gij gyaqcienz yausu, gyangqdaemq gij cingzbonj gaicawx cidu daiqdaeuj. Cimdoiq gij vwndiz yawjnaek saemjbae、yawjmbaeu gamguenj、noix gangj fugsaeh ciengzgeiz mizyouq haenx, raeuz lienzdaemh haeujlaeg gaijgwz“cuengqgienz、guenjleix、fugsaeh”, gyavaiq cienjbienq cwngfuj ciznwngz, gemjnoix veizgvanh guenjleix、cigsoh capfwngz, yawjnaek gyagiengz hungzgvanh diuzgung、hawciengz gamguenj caeuq goenggungh fugsaeh. Haj bi daeuj, gij saehhangh youz aen bouhmonz Gozvuyen guh hingzcwng saemjbae haenx gemjnoix 44％, gij saemjbae mbouj dwg hingzcwng cinjhawj haenx gaenq mbouj lw saek yiengh, gij hanghmoeg cunghyangh cwngfuj haedcinj giyez douzswh haenx gemjnoix 90％, gij saehhangh hingzcwng saemjbae cunghgai fugsaeh haenx gemjnoix 74％, cinjhawj caeuq nyinhdingh cizyez swhgwz gemjnoix haujlai. Gij hanghmoeg youz cunghyangh cwngfuj dinghgyaq de gemjnoix 80％, gij hanghmoeg youz deihfueng cwngfuj dinghgyaq de gemjnoix 50％ doxhwnj. Cienzmienh gaijgwz gij cidu mizgven seng’eiq lumjbaenz gunghsangh daenghgeiq、cucwz swhbwnj daengj, haibanh giyez yungh seizgan sukdinj sam faenh cih it doxhwnj.Cauhmoq caeuq gyagiengz gamguenj mwh guh saeh、saeh laeng, saedhengz“song yiengh seizbienh、aen goenghai ndeu”, seizbienh cou boux genjcaz caeuq boux deng genjcaz、gibseiz goenghai cazcawq gezgoj, daezsang le gamguenj yauqnaengz caeuq goengcingq. Doihengz“vangjdoxlienz＋cwngvu fugsaeh”, saedhengz doengh gij guhfap camh ndeu fugsaeh caez. Gij vanzging guh seng’eiq gaijndei yienhda, gij rengzhoengh hawciengz lai ak yienhda, cungqvunz banhsaeh lai ngaih yienhda.
（Sam）Genhciz aeu cauhmoq bae dazyinx hwngfat, comzrengz gikfat gij rengz cauhmoq ndawbiengz, gij naengzlig caeuq yauqlwd cingjdaej cauhmoq daezsang yienhda. Saedhengz aen canloz aeu cauhmoq bae coidoengh hwngfat, coisawj cauhmoq swnghdai bienqndei bae, guhbaenz yiengh gapgyaq geksik cauhmoq miz lai aen cawjdaej boiqhab、seiq fueng bet baih doicaenh. Hawj gohyenz gihgou caeuq gauhyau gohyenz lai miz gienz gag guhcawj, gaijndei guenjleix gohyenz hanghmoeg caeuq ginghfei, gyalaeg gaijgwz guenjleix gij gienzik gohgi cwngzgoj. Doicaenh sawq guh gaijgwz cienzmienh cauhmoq, daemxcengj Baekging、Sanghaij hwnqguh gohgi cauhmoq cungsim, saen laeb 14 giz dieg yienghndei guekgya gag guhcawj cauhmoq, youz doengh gij dieg neix daeuj daiqdoengh guhbaenz buek dieg cauhmoq maenhndei ndeu. Aeu giyez guh cawjdaej gyagiengz hwnqguh aen dijhi cauhmoq gisuz, nyoenxok buek giyez yienghmoq nem damqra haifat gihgou yienghmoq miz naengzlig caeuq guek wnq beijak ndeu.Haeujlaeg bae haiguh vunzlai cauhnieb、vunzlai cauhmoq, saedhengz gij cwngcwz daemxcengj ndaej ndei doh de, laebndei aen dijhi gungganq giyez yienghmoq. Gak loih hawciengz cawjdaej dabdaengz 9800 lai fanh hoh, haj bi daeuj demgya 70％ doxhwnj. Ndawguek gij soqliengh fatmingz conhli mizyauq haenx demgya song boix, gij soqngeg gaicawx gisuz lai boix ndeu. Gij gohgi cauhmoq guek raeuz daj gaenlaeng buet cienj coh lai aen lingjyiz bingzbaiz buet、lingxdaeuz buet, bienqbaenz gizdieg cauhmoq cauhnieb hoenghhwd daengx seiqgyaiq cungj cimyawj.
（Seiq）Genhciz cienzmienh gyalaeg gaijgwz, comzrengz buqcawz yiengh mbouj ndei ndaw dijci gihci, mboujduenh gya rengz doidoengh hwngfat. Gaijgwz giyez guekmiz、swhcanj guekmiz netsaed guh baenaj, gaijbaenz gunghswh bae daihdaej guhsat, gyan’gyoeb dauqcungz cujhab、gemjnoix caengzgaep、daez caet dem yauq ndaej daengz hwngfat yienhda. Gij yauqik giyez guekmiz cienjndei yienhda, bi’gvaq leihyinh demmaj 23.5%. Gyalaeg gaijgwz nwngzyenz、dietloh、hangznieb gyu daengj. Cuengqsoeng biujcinj hawj yiengh ginghci mbouj dwg gunghyoujci de haeuj hawciengz. Laebhwnj aen cidu doengjit daenghgeiq gij caizcanj mbouj senjdoengh ndaej de. Laebndei aen cidu baujhoh canjgienz. Gaijgwz caizsui yamqok yamqdin hungnaek, cienzmienh doihengz goenghai caizcwng yawhsuenq gietsuenq, cauhlaeb aen geksik gapgyaq faenboiq souhaeuj cunghyangh caeuq deihfueng aeu caez faenyungh cienzgvaeh guh goek haenx, haiguh gaijgwz vehfaen gij caizcwng saehgienz caeuq ceiok cwzyin cunghyangh nem deihfueng, cunghyangh bingzciengz cienjok ceihawj deihfueng demgya fukdoh lai hung lai gvangq、gij hanghmoeg cienhangh cienjok ceihawj de gemjsiuj sam faenh cih ngeih. Daihdaej cuengqhai guenjhaed leihsik, laebhwnj gij cidu baujyiemj cunz ngaenz, doidoengh gij sanghyez ngaenzhangz hung rauh de ndalaeb aen swyezbu hawj doh ginhyungz ndeicawq, gyalaeg gaijgwz gij ginhyungz gihgou cwngcwz singqcaet、haifat singqcaet de, giengzvaq aen gihci boiqhab gamguenj ginhyungz. Onjbouh doicaenh gyoebhab gaijgwz gyauyuz, laebndei aen gihci coicaenh singz mbanj yivu gyauyuz bingzyaenx hwngfat, gaijgwz gij cidu gaujsi ciuseng. Laebhwnj aen cidu doengzcaemh gihbwnj ciengxlaux、ywbingh baujyiemj gihminz singz mbanj, guhbaenz gij cidu ciengxlaux baujyiemj gihgvanh saehnieb danhvei caeuq giyez doxcaemh roenloh. Fatbouh aen fueng’anq vehcienj bouhfaenh swhbwnj guekmiz boujcung sebauj gihginh. Saedhengz lienzdoengh gaijgwz yihliuz、yihbauj、yihyoz, cienzmienh haiguh gyoebhab gaijgwz yihyen goenglaeb, siubae aen cwngcwz cienzyw demgya cienzcanh cingzsoq ciengzseiz saedhengz haenx, gaijgwz aen cidu saemjbae gijyw、gij gihgi ywbingh aeundaej cungbyoengq. Doicaenh gaijgwz gij“sam gienz”faenlaeb diegbauguh lajmbanj、gij menciz doekdingh bouxgaem de mauhgvaq 80％, gaijgwz aen cidu soucuengq gij nungzcanjbinj ceiq youqgaenj de. Laebndei gij cidu giz dieg cawjdaej gunghnwngz, laebhwnj aen cidu gaujbingz gij cikyauq caeuq gyaepcaz gij cwzyin swnghdai vwnzmingz, doihengz gij cidu bouxdaeuz guenj dah、bouxdaeuz guenj huz, youq aen vanzbauj gihgou swngjgaep doxroengz de sawq guh gij cidu cigsoh guenjleix. Gak aen lingjyiz gaijgwz ndaej haeujlaeg, doidoengh ginghci hwngfat ndaej lienzdaemh riengjvaiq.
（Haj）Genhciz diuz gihbwnj gozcwz doiq rog hailangh, comzrengz saedyienh gapguh caez leih, gij suijbingz yiengh ginghci hailangh de daezswng yienhda. Iudaeuz hemqguh caeuq doidoengh“it rangh it loh”, fathwnj cauhlaeb Yadouzhangz, laebhwnj Swhlu Gihginh, buek hanghmoeg hungnaek doxlienz doxdoeng、ginghmou gapguh ndeu doeksaed daengz dieg. Ndalaeb Sanghaij daengj 11 giz dieg sawq guh swyouz gaicawx, buek cwngzgoj giz sawqguh gaijgwz ndeu doigvangq daengz daengx guek. Laebndei gij gihci rapdawz cuzgouj doiqgvaeh、gij soqliengh doiqgvaeh saen gya de cienzbouh youz cunghyangh caizcwng rapdawz, laebhwnj 13 giz gyoebhab sawqguh gwnzvangj hongsaeh seng’eiq hamj gyaiq, gozci gaicawx“aen cueng ndeu banh caez”mbedoh daengx guek, yinhhuq doenggvan seizgan bingzyaenz sukdinj dingz ndeu doxhwnj, cingouj cuzgouj guhbaenz dauq onj coh ndei. Canghseng’eiq guekrog douzswh daj cidu saemjbae cienjyiengq doenggvaq mbawdan gimq guh guenjleix, gij guhfap hanhhaed singqcaet de gemjnoix sam faenh cih ngeih. Gij gapgyaq swhbwnj guekrog douzswh ndaej bienq ndei, gij canjnieb gisuz sang ciemqbeij daezsang boix ndeu. Gya rengz yinxhaeuj bouxcaixhangz, bouxcaixhangz rogguek daeuj guek raeuz guhhong demgya 40％. Dazyinx doiq rog douzswh cangqheiq hwngfat. Doicaenh gozci canjnaengz gapguh, gauhdez、hwzden daengj byaij yiengq seiqgyaiq. Caiq ciemdingh caeuq swnggaep 8 aen yaengdingh swyouz gaicawx. Doxriengz haidoeng Hu Gangj doxdoeng、Sinh Gangj doxdoeng、caigen doxdoeng, yinzminzbi gyahaeuj aenlamz hobi Gozci Hobi Gihginh Cujciz Daegbied Dizgvanjgenz bae, yinzminzbi bienqbaenz gwnz seiqgyaiq ndaej yungh byaijok yamqdin youqgaenj. Cungguek hailangh ndaej gya’gvangq, miz rengz bae coicaenh bonj guek hwngfat, daiq seizndei youqgaenj daeuj hawj seiqgyaiq.
（Roek）Genhciz saedhengz aen canloz ranghdieg doxdaengh hwngfat caeuq cwngzcinva yienghmoq, comzrengz doidoengh doxdaengh hwngfat, gyavaiq majbaenz doengh giz gyawj guhdoih hwngfat、rangh dieg lienzbenq hwngfat. Gaenxmaenx doicaenh Baekging Denhcinh Hozbwz guhdoih hwngfat、rangh dieg ginghci Cangzgyangh lienzbenq hwngfat, bienguh caephengz mizgven gveihva, hwnqguh buek cungdenj hanghmoeg ndeu. Fatbouh baenzroix banhfap gaijgwz cauhmoq coicaenh haifat Baihsae、saenqhwng Doengbaek、coisawj Cungqgyang hwnghwnj、Baihdoeng hwngfat gonq. Gya rengz bangfuz dieg doenghbaez guh gwzming、dieg minzcuz、dieg henz guek、dieg gungzhoj, lai roengzrengz guh gij hong daemxcengj Sihcang、Sinhgyangh、Cinghhaij. Baujhoh caeuq haifat haijyangz miz bouhloh guh baenaj. Saedhengz aen gveihva hawsingz cungdenj gap gyoengq hwngfat, hawsingz hung rauh iq caeuq singz iq doxdaengh hwngfat. Daih dingzlai hawsingz cuengqsoeng diuzgen hawj vunz haeuj singz an’gya, cienzmienh caephengz gij cidu mbawcingq youqdingh, hawsingz gihbwnj goenggungh fugsaeh gyuem daengz boux ciengzyouq de. Rangh dieg singz mbanj hwngfat raen doxdaengh haujlai.
（Caet）Genhciz gij hwngfat swhsiengj aeu lwgminz guh cungsim, comzrengz baujcang caeuq gaijndei gij gwndaenj lwgminz, sawj cungqvunz roxnyinh cug ngoenz bienq ndei. Dangqnaj cienzngaenz gaenj lai, aeu lienzdaemh gyalai douzhaeuj minzswngh. Cienzmienh doicaenh dawzcinj banggungz、dawzcinj duetgungz, laebndei yiengh gihci guhhong cunghyangh cingjdaej suenqveh、ndaw sengj rap cungjdaej cwzyin、si yienh dawzndei doeksaed, cunghyangh caizcwng haj bi douzhaeuj cienhangh cienzngaenz banggungz 2800 lai ik maenz. Saedhengz gij couhnieb cwngcwz gaenxmaenx de, gyoengq vunz cungdenj de ndaej baujcang couhnieb haemq ndei. Genhciz sien hwngfat gyauyuz gonq, gij cienz caizcwng bued hawj gauj gyauyuz de ciemq ndawguek swnghcanj cungjciz lienzdaemh mauhgvaq 4％. Gaijndei gij diuzgen banhhag doengh aen hagdangz yivu gyauyuz mbangnyieg lajmbanj, lai gya cienzhong fukleih hawj lauxsae lajmbanj, aen giva gaijndei yingzyangj sawj 3600 lai fanh boux hagseng lajmbanj souh’ik. Cauhlaeb aen dayoz caeuq yozgoh miz seiqgyaiq suijbingz. Aen gauhyau cungdenj de cienhangh ciusou gij vunzsoq hagseng lajmbanj caeuq giz dieg gungzhoj daj fanh vunz ndeu demgya daengz 10 fanh vunz. Doiq gak loih yozyau doengh boux hagseng ranz hoj de gya rengz bangcoengh, miz 4.3 ik vunzbaez ndaej ndeicawq. Doengh boux nienzgeij hab guhhong de bingzyaenz souh gyauyuz nienzhanh daezsang daengz 10.5 bi. Aen biucinj caizcwng bangbouj gihminz gihbwnj yihbauj moix vunz bingzyaenz daj 240 maenz daezsang daengz 450 maenz, daihdaej laebhwnj le aen cidu bingh hung baujyiemj, gaenq miz 1700 lai fanh vunzbaez souh’ik, gij cienz youq dieg wnq yihyen yawj bingh yw bingh, ndaej cigsoh gietsuenq, faengaep yawj bingh yw bingh caeuq cauhlaeb yihliuz lenzhozdij ndaej gyavaiq guh baenaj. Lienzdaemh hableix daezsang gihbwnj yangjlaujginh hawj doengh boux duiyouh de. Daezsang aen biucinj dihbauj、youhfuj daengj, laebndei aen cidu ndawbiengz gouqbang, gij gihbwnj gwndaenj doengh boux gwn dihbauj caeuq ranz hojndoq de ca mbouj lai miz 6000 fanh vunz ndaej daengz baujcang. Cimdoiq doengh boux gungzhoj caeuq ndangcanz youqgaenj laebhwnj aen cidu“song hangh boujdiep”, 2100 lai fanh vunz ndaej ndeicawq. Hengzguh aen cwngcwz cienzbouh ndaej seng song lwgnyez. Lai roengzrengz youq caengzgiek guh goenggungh vwnzva fugsaeh, gyavaiq hwngfat gij saehnieb vwnzva, aen canjnieb vwnzva moix bi bingzyaenz demmaj 13％ doxhwnj. Daengxcungq lwgminz lienh ndang ndaej mbeguh gvangqlangh, doengh boux ak lienh dijyuz de gamj bae cauh ok cingzcik maenhndei.
（Bet）Genhciz bouxvunz caeuq swhyienz doxhuz hwngfat, comzrengz ceihleix vanzging uqlah, gij hong cauhlaeb swnghdai vwnzmingz cingzyauq yienhda. Laebhwnj cungj leixniemh raemx saw bya heu couh dwg byagim bya’ngaenz, yungh gij gietsim caeuq goengrengz doenghbaez caengz miz gvaq de gyagiengz baujhoh swnghdai vanzging. Haenqrengz cingjceih dienheiq uqlah, naed faenx iqiq（PM2.5）giz dieg cungdenj de bingzyaenz noengzdoh doekdaemq 30％ doxhwnj. Gyagiengz ceihleix meiz sanq, doicaenh hangznieb cungdenj mbaetyungh nwngzyenz gemjnoix baizcuengq, 71％ meizden gihcuj guhbaenz baizcuengq gig noix. Gaijndei aen gapgyaq nwngzyenz, siuyungh meizdan soj ciemq faenhliengh doekroengz 8.1 aen bakfaendiemj, siuyungh nwngzyenz cingseuq soj ciemq faenhliengh daezsang 6.3 aen bakfaendiemj. Daezsang gij binjcaet youzcoemh, raengcawz gij ci biu henj gij ci gaeuqgat de 2000 lai fanh gyaq. Gyagiengz fuengzceih gij raemx uqlah ranghdieg benq haij cungdenj de, gij soqliengh sawjyungh vafeiz nungzyoz guh daengz mbouj caiq demmaj. Doicaenh aen gunghcwngz hungmbwk baujhoh caeuq coihfuk swnghdai, gya’gvangq doiq geng ndaem faex ndaem nywj hoizfuk diegdingh diegcumx, gyagiengz gyoebhab ceihleix dieg bienq sa bienq fwz、dieg loh ok rinbya、raemx namh riuzsaet. Haiguh cunghyangh dukcaz vanzbauj, yiemzsuk cazcawq gij anqgienh famhfap. Gaenxmaenx doidoengh《Bahliz Hezding》 ciemcih seng’yauq, guek raeuz youq wngqdoiq cienz seiqgyaiq dienheiq bienqvaq fuengmienh fazveih le cozyung youqgaenj.
（Gouj）Genhciz ciuqfap cienzmienh hengzguh gij ciznwngz cwngfuj, comzrengz gyagiengz caeuq cauhmoq ceihleix ndawbiengz, ndawbiengz baujciz huzndei onjdingh. Daezcingj Daengx Guek Yinzda Cangzveijvei ceiqdingh coihdingh faplwd 95 bouh, ceiqdingh coihdingh hingzcwng fapgvi 195 bouh, coihgaij feiqcawz baenz daihbuek bouhmonz gvicieng. Sengj、si、yienh cwngfuj bouhmonz ceiqdingh goengbouh le mbaw cingdan gienzlig cwzyin. Haiguh Gozvuyen daih dukcaz caeuq cienhangh dukcaz, daih haenh boux gaenx guh、cingzyauq yienhda de caemhcaiq yungh cwngcwz bae gikcoi, yiemzsuk gyaepdawz gij cwzyin guh mbouj baenz de. Cauhmoq ceihleix caengzgiek singz mbanj. Laebndei aen cidu hongsaeh sinfangj. Gya’gvangq aen gvaengh faplwd daemxcengj. Coicaenh gaijgwz hwngfat aen lingjyiz ancienz swnghcanj, aen cungjsoq saehhux caeuq aen soq saehhux hungnaek、daegbied hungnaek de lienzdaemh doekdaemq. Gaijgwz laebndei gamguenj gijgwn gijyw ancienz, gyagiengz daengx aen bouhloh guenjhaed fungyiemj. Gyagiengz gij hongsaeh fuengzcai gemjcai gouqcai lumjbaenz deihdoengh、raemxrongz caihaih hungnaek daengj, laebndei aen gihci wngqgip faengaep fucwz、dox boiqhab ndei, cingzdoh ceiq daih gemjnoix gij sonjsaet deng cai. Gyagiengz guekgya ancienz. Laebndei aen dijhi fuengzre gaemhanh cianh ndawbiengz, ciuqfap dwkceih gak cungj famhfap famhcoih, mizrengz henhoh le goenggungh ancienz.
Gvancez doeksaed aen baijbouh Dangjcunghyangh cienzmienh coengzyiemz ceih Dangj, gyagiengz cauhlaeb dangjfungh lenzcwng caeuq fanj nduknaeuh doucwngh. Haeujlaeg haiguh gij hozdung aeu diuz lohsienq cungqvunz aen Dangj daeuj guh gyauyuz caeuq sizcen、haiguh“sam yiemz sam saed”ciendaez gyauyuz、haiguh“song hag it guh”hagsib gyauyuz, nyinhcaen doeksaed gij cingsaenz bet hangh gvidingh Dangjcunghyangh, dingjnanz genhciz niujcingq“seiq cungj rumzmbeuj”, dawzyiemz caephengz aen“iek fap sam cieng”Gozvuyen. Yiemzhaenq gaemhanh saen hwnq gij louz、dangz、gvanj、soj cwngfuj cienyungh caeuq caizcwng ciengx vunz cungjvunzsoq, daih fukdoh gemjnoix ginghfei“sam goeng”. Gyagiengz gamcaz hingzcwng caeuq gamduk saemjgeiq. Genhgez cazcawq caeuq niujcingq gij hingzveiz famhfap famh gvidingh, yiemzhaenq fadceih doengh boux nduknaeuh, aen seiqdaeuz lanzdangj mbouj ndaej fanj nduknaeuh gaenq ndaej guhbaenz caemhcaiq gyamaenh hwngfat.
Gak boux daibyauj！
Haj bi gvaqbae neix, gij hong minzcuz、cunghgyau、gyauzvu daengj cauhmoq doi baenaj. Daemxcengj giz dieg minzcuz gyavaiq hwngfat, aen saehnieb minzcuz doxgiet cinbu aeundaej hwngfat baenaj riengjvaiq. Gaenxmaenx dazyinx cunghgyau caeuq aenbiengz sevei cujyi dox hab’wngq. Doengh boux gyauzbauh rogguek caeuq gveihgyauz gyauzgen youq ndaw yendaiva gensez guh ok le gunghawj daegbied.
Haj bi gvaqbae neix, baengh Dangjcunghyangh、Cunghyangh Ginhveij lingjdauj, bingdoih hwnghwnj bienq ak youh haicauh ok yienghmoq. Ceiqdingh aen canloz fuengcim bingsaeh laj hingzseiq moq, ciuhai Gujdenz Cenzginh Cwngci Gunghcoz Veiyi, haeujlaeg doicaenh aeu cwngci dajcauh bingdoih、aeu gaijgwz hawj bingdoih bienq ak、baengh gohgi saenqhwng bingdoih、ciuqfap ceihleix bingdoih, hawj aen bingdoih lwgminz raeuz saedyienh gaijlaeb gij yiengh seng fat cwngci、gaijlaeb gij yiengh cujciz、gaijlaeb dijhi ligliengh、gaijlaeb cozfungh yienghsiengq. Mizyauq caephengz gij yinvu hungmbwk bingsaeh, lumjbaenz gwnz haij hen gienz、fanj gungj hen onj、ciengjyiemj gouqcai、gozci henhoh huzbingz、Yadinghvanh hen ruz、yinzdau cujyi gouqcoengh daengj. Gak fueng boiqhab daihdaej guhbaenz aen yinvu gemj gij bing dinghngeg de 30 fanh. Aen yendaiva suijbingz cangboiq bingsaeh daezswng yienhda, bing minz yungzhab cingzdoh haeujlaeg.Bingdoih caeuq cwngfuj、bingdoih caeuq lwgminz gaenjmaed doxgiet. Gij yienghsiengq bingdoih moqyat, youq gwnz roen hawj bingdoih bienq ak miz gij daegsaek Cungguek yamq ok yamqdin onjsaed.
Haj bi gvaqbae neix, gij hongsaeh Gangj Au Daiz caiq ndaej doicaenh baenaj. Caensaed hengzguh“aen guekgya ndeu song cungj cidu”ndaej mboujduenh gyalai caeuq hwngfat, gij gienzvi Fapgoek caeuq Gihbwnjfaz youq Gangj Au Daiz caiq yienhloh okdaeuj, Diegndaw caeuq Gangj Au Daiz gyaulouz gapguh ndaej doi haeuj laeg bae, diuz giuz Gangj Cuh Au Da’gyauz cienz sienq lienzdoeng, Yanghgangj Aumwnz baujciz mwnhoengh onjdingh. Genhciz gij yenzcwz aen Cungguek dog caeuq“gij nyinhrox doxdoengz 92 nienz”, gyagiengz song hamq youq ginghci vwnzva fuengmienh gyaulouz gapguh, guhbaenz bouxdaeuz song hamq baez doxraen miz cungj eiqngeih lizsij. Genhgez fanjdoiq caeuq naenxroengz gij seiqlig faenmbek“Daizvanh doglaeb”, mizrengz henhoh Daizhaij doxhuz onjdingh.
Haj bi gvaqbae neix, yiengh vaigyauh guekhung miz gij daegsaek Cungguek de cienzmienh doi baenaj. Haibanh baenz gij vaigyauh cawjciengz hung, lumjbaenz Baez Gauhfungh Lundanz Gozci Gapguh“It Rangh It Loh”Gaiq Daih’it、Baez Hoih Mbouj Cingqsik Bouxdaeuz Yadai Ginghci Gapguh Cujciz、Baez Hoih Hangzcouh Funghvei Bouxdaeuz Ngeihcib Guek Cizdonz、Bouxdaeuz Aen Guekgya Gimcien Yamwnz Doxraen daengj. Siz Ginbingz cujsiz daengj boux lingjdaujyinz guek raeuz okbae fangjvwn lai aen guekgya, camgya gij hozdung hungnaek de, lumjbaenz baenzroix funghvei Lenzhozgoz、Dienheiq Bienqvaq Daihhoih、Seiqgyaiq Ginghci Lundanz、baenzroix hoih bouxdaeuz Dunghya gapguh daengj, yiengh baijbouh vaigyauh gak fueng’vih ndaej mbeguh haeujlaeg bae. Lingxdaeuz hemqguh gaqlaeb aen cingjdaej minghyinh caezcaemh vunzloih, vih aen dijhi daengx seiqgyaiq hengzguh ceihleix ndaej daengz gaijbienq gunghawj gij dungxcaiz Cungguek engq lai. Yiengh vaigyauh ginghci、cungj gyaulouz yinzvwnz de gig miz cingzyauq. Giendingh henhoh aen cawjgienz guekgya caeuq gij gienzik haijyangz. Cungguek dangguh aen guekhung raphwnj cwzyin ndeu, youq mwh gaijgez gij vwndiz gozci caeuq digih cungj gig gvansim haenx fazveih cungj cozyung gaenxmaenx coicaenh youqgaenj, vih seiqgyaiq huzndei caeuq hwngfat youh caiq guh ok gunghawj hungmbwk.
Gak boux daibyauj！
Ngeuxyawj haj bi gvaqbae neix, haujlai mauzdun doxgeuj doxdab, gak cungj fungyiemj caeuq deuqnyex daemh giujdin daeujdaengz, youq ndawguek rogguek, haujlai cingzgvang dwg gaijgwz hailangh doxdaeuj lij caengz bungzdaengz gvaq, gij cingzcik gaijgwz hwngfat guek raeuz saedcaih ndaej daeuj mbouj yungzheih. Neix dwg aen Dangjcunghyangh aeu Siz Ginbingz dungzci guh gyangsim haenx giengiengz lingjdauj ndaej daeuj, dwg Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz gohyoz ceijyinx ndaej daeuj, dwg daengx Dangj daengx ginh daengx guek gak cuz yinzminz doxgiet haenqrengz buekguh ndaej daeuj. Gou daibyauj Gozvuyen, caensim docih daengx guek gak cuz yinzminz, caensim docih gak minzcuj dangjbai、gak yinzminz donzdij caeuq boux mizmingz gak gyaiq! Caensim docih gyoengq beixnuengx Yanghgangj Daegbied Hingzcwnggih、gyoengq beixnuengx Aumwnz Daegbied Hingzcwnggih、gyoengq beixnuengx Daizvanh caeuq gyoengq beixnuengx youq rogguek! Caensim docih gak guek cwngfuj、gozci cujciz caeuq gak guek baengzyoux gvansim caeuq daemxcengj Cungguek cauhlaeb yendaiva saehnieb!
Mwh an’onj mbouj lumz yungyiemj, seiz hwnghoengh mbouj lumz haemzhoj. Raeuz singjsag dwk rox daengz, guek raeuz vanzlij cawqyouq caemhcaiq yaek ciengzgeiz cawqyouq duenh cogaep sevei cujyi, vanzlij dwg aen guekgya ceiq hung cingqcaih hwngfat gwnz seiqgyaiq, mbangjdi vwndiz doedyienh cauhbaenz hwngfat mbouj doxdaengh mbouj cungfaen lij caengz gaijgez. Gij rengz baihndaw doidoengh ginghci demmaj lij mbouj cukgaeuq, gij naengzlig cauhmoq lij mbouj gaeuq ak, hwngfat caetliengh caeuq yauqik mbouj gaeuq ndei, miz mbangj giyez daegbied dwg giyez rauh iq ginghyingz hojnanz, ndawbiengz douzswh demmaj naiqnyieg, mbangj giz deihfueng ginghci gyodroengz atlig haemq daih, gij huxndumj fungyiemj ndaw lingjyiz ginhyungz daengj mbouj ndaej yawjlawq. Aen yinvu gunggeng duetgungz gannanz naekcaem, aen giekdaej nungzyez lajmbanj vanzlij mbangnyieg, ranghdieg singz mbanj hwngfat caeuq souhaeuj faenboiq ciuqgaeuq lij cengca haemq daih. Youq ndaw ancienz swnghcanj seiz mbouj seiz ok gij saehhux hungnaek caeuq daegbied hungnaek. Youq hoengheiq caetliengh、vanzging veiswngh、gijgwn gijyw ancienz caeuq ranzyouq、gyauyuz、yihliuz、couhnieb、ciengxlaux daengj fuengmienh, miz haujlai giz vunzlai lij mbouj hab’eiq. Cwngfuj ciznwngz cienjbienq mbouj daengz vih. Hong cwngfuj guh ndaej mbouj gaeuq, miz di guhfap caeuq cwngcwz gaijgwz doeksaed mbouj rengz, gij eiqsik fugsaeh caeuq gij eiqsik fapceih mbangjdi ganbu mbouj giengz, cozfungh guhhong mbouj saed、cingsaenz dangrap mbouj gaeuq, miz cingzdoh mbouj doengz hingzsiz cujyi、gvanhliuz cujyi. Vunzlai caeuq giyez doiq banhsaeh nanz、luenh soucienz lij miz yigen. Mbangj aen lingjyiz fatseng rumzheiq mbouj cingq caeuq nduknaeuh vwndiz lai. Raeuz itdingh aeu yungh cungj cingsaenz doiq guekgya caeuq lwgminz gig fucwz, yungh gij damjliengh mbouj lau gannanz、gij eiqceiq genqnyangq giendingh, caenhsim caenhrengz guhndei hongsaeh, sawj yinzminz cwngfuj doiq ndaej hwnj diuz rapnaek lwgminz dak hawj！
Ngeih、Gij Cungjdaej Iugouz Caeuq Cwngcwz Cohyiengq Ginghci Sevei Hwngfat 2018 Nienz
Bineix dwg bi haidaeuz cienzmienh gvancez gij cingsaenz Cibgouj Daih aen Dangj, dwg gaijgwz hailangh 40 hopbi, dwg bi ceiq youqgaenj ciep gonq hai laeng hingz ndaej cienzmienh hwnqbaenz aenbiengz siujgangh、saedhengz“Cibsam Haj”Gveihva. Yaek guhndei hongsaeh cwngfuj, aeu miz aen Dangjcunghyangh aeu Siz Ginbingz dungzci guh gyangsim giengiengz lingjdauj, aeu Majgwzswh Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh、Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj ceijyinx, cienzmienh haeujlaeg gvancez gij cingsaenz Cibgouj Daih aen Dangj caeuq Cibgouj Gaiq Ngeih Cung、Sam Cung Cienzhoih, gvancez gij gihbwnj lijlun、gihbwnj lohsienq、gihbwnj fanghloz aen Dangj, genhciz caeuq gyagiengz aen Dangj cienzmienh lingjdauj, genhciz aen diuhgoek guhhong youq ndaw onjmaenh gouz baenaj, genhciz hwngfat leixniemh moq, gaenjndaet hopheux gij sevei cujyau mauzdun bienqvaq guek raeuz, ciuq gij iugouz caetliengh sang bae hwngfat, cingjdaej suenqveh doicaenh aen cungjdaej baijbouh“haj yiengh gyoeb baenz cingjdaej”caeuq doxdaengh doicaenh aen canloz baijbouh“seiq aen cienzmienh”, genhciz aeu gaijgwz gij gapgyaq mbiengj gunghawj guh cawjsienq, cingjdaej suenqveh doicaenh doengh yiengh hong onj demmaj、coi gaijgwz、diuz gapgyaq、ik minzswngh、fuengz fungyiemj, haenqrengz doicaenh gaijgwz hailangh, cauhmoq caeuq laebndei hungzgvanh diuzgung, doidoengh coengz goekgaen bae gaijbienq caetliengh、yauqlwd、rengznyoengx, daegbied youq aen fuengmienh gungroengz vwndiz hojnanz lumjbaenz fuengzre vaqgej fungyiemj hungnaek、dawzcinj duetgungz、fuengzceih uqlah cungj yaek aeundaej baenaj maenhsaed, dazyinx caeuq onjdingh yawhgeiz, gyagiengz caeuq gaijndei gij gwndaenj lwgminz, coicaenh ginghci sevei hwngfat ndaej lienzdaemh cangqheiq.
Gyoebhab faensik gij hingzseiq ndawguek rogguek, guek raeuz hwngfat bungzdaengz seizgei ndei caemh miz deuqnyex. Seiqgyaiq ginghci miz muengh fukhwng, hoeng gij yinhsu mbouj onjdingh mbouj doekdingh de gig lai, cujyau ginghcidij diuzcingj cwngcwz daiq lienz gij yauqwngq roenx ok rog de daiq daeuj saehcingz nanz liuh, baujhu cujyi gyahaenq, cungj cwngci fungyiemj aenvih guekgya diegyouq cauhbaenz haenx swnghwnj. Ginghci guek raeuz cingq cawqyouq mboengq gunggvan cienjbienq fuengsik hwngfat、gaijndei ginghci gapgyaq、cienjvuenh rengznyoengx demmaj, lij aeu benz haujlai ndoi、gvaq haujlai gumzgamx, yaek wngqdoiq gij fungyiemj caeuq deuqnyex liuh ndaej daengz nem nanz liuh ndaej daengz de. Saedguh biujmingz, gij cingzcik hwngfat Cungguek coengzlaiz cungj dwg gung roengz nanzgvan cij aeu ndaej. Seizneix aen giekdaej vuzciz gisuz guek raeuz engqgya nanoek, canjnieb dijhi caezcup、hawciengz hungloet、swhyenz rengzvunz lairaeuh、cauhnieb cauhmoq hoenghhwd, gij youhsi gyoebhab de yienhda, miz naengzlig miz diuzgen saedyienh cungj hwngfat caetliengh engq sang、engq miz yauqlwd、engqgya goengbingz、engq ndaej lienzdaemh roengzbae haenx.
Gij muzbyauh yawhgeiz ceiq youqgaenj bineix hwngfat dwg: Ndawguek swnghcanj cungjciz demmaj 6.5％baedauq; gij gyaqcienz siuyungh gihminz hwnjsang fukdoh 3％baedauq; hawsingz lai gya couhnieb 1100 fanh vunz doxhwnj, hawsingz diucaz saetnieb beijlwd 5.5％ doxdauq, hawsingz daenghgeiq saetnieb beijlwd 4.5％doxdauq; gihminz souhaeuj demmaj caeuq ginghci demmaj daihdaej doxdoengz; cingouj cuzgouj byaij onj coh ndei, gozci soucei daihdaej doxdaengh; danhvei ndawguek swnghcanj cungjciz siuyungh nwngzyenz doekdaemq 3％ doxhwnj, gij uqlah youqgaenj haenx baizcuengq soqliengh laebdaeb doekdaemq; gaijgwz gij gapgyaq mbiengj gunghawj ndaej yamq ok yamq youqgaenj, hungzgvanh gangganj beijlwd baujciz daihdaej onjdingh, miz bouhloh youh mizyauq fuengzre gaemhanh gak loih fungyiemj.
Gij muzbyauh yawhgeiz ceiq youqgaenj gwnzneix gangj, naemj daengz le cungj aeuyungh guh caez gij yinvu cienzmienh hwnqbaenz aenbiengz siujgangh, hab gij saedceiq ginghci guek raeuz gaenq daj mboengq demmaj riengjvaiq cienjyiengq mboengq hwngfat caetliengh sang. Daj ginghci giekdaej caeuq gij naengzlig ciepsou couhnieb daeuj yawj, demmaj vaiqmenh miz 6.5％baedauq couh ndaej saedyienh couhnieb haemq cungfaen. Hawsingz diucaz saetnieb beijlwd baudaengz nungzminzgungh daengj gij vunz ciengzseiz youq hawsingz de, bineix baez daih’it dawz aen cijbyauh neix dangguh muzbyauh yawhgeiz, yawhbienh engq cienzmienh fanjyingj couhnieb cingzgvang, engq ndei daejyienh aen iugouz caez gwn gij mak hwngfat.
Bineix aeu laebdaeb cauhmoq caeuq laebndei hungzgvanh diuzgung, dawz ndei hungzgvanh diuzgung faenconq, baujciz hungzgvanh cwngcwz ndaej lienzdaemh onjdingh, gyagiengz hawj doengh hangh cwngcwz caizcwng、hobi、canjnieb、ranghdieg daengj hezdiuz boiqhab ndei.
Baujciz aen caizcwng cwngcwz gaenxmaenx de mbouj bienq, aeu comz rengz dem yauq. Bineix aen beijlwd caizcwng ceiok lai gvaq souhaeuj dajsuenq ciuq 2.6％ anbaiz, beij bi’gvaq yawhsuenq daemq 0.4 aen bakfaendiemj; caizcwng ceiok lai gvaq souhaeuj 2.38 fanh ik maenz, ndawde cunghyangh caizcwng ceiok lai gvaq souhaeuj 1.55 fanh ik maenz, deihfueng caizcwng ceiok lai gvaq souhaeuj 8300 ik maenz. Diuzdaemq aen beijlwd caizcwng ceiok lai gvaq souhaeuj, cujyau dwg guek raeuz ginghci byaij onj coh ndei、caizcwng demsou miz giekdaej, hix louz miz cwngcwz hoenggan engq lai hawj guh hungzgvanh diuzgung. Bineix daengx guek caizcwng ceiok 21 fanh ik maenz, aen gvaengh ceiok caiq miz gya’gvangq. Cunghyangh bingzciengz cienjok ceihawj deihfueng demmaj 10.9％, demgiengz gij caizlig deihfueng daegbied dwg gij caizlig Cungqgyang Baihsae. Gaijndei gij gapgyaq caizcwng ceiok, coisawj caizcwng ceiok hawj goenggungh lai、souh’ik doh, gya rengz daemxcengj guh ndei sam daih hongsaeh ceiq hoj guh haenx, engq lai ngeng coh doengh aen lingjyiz cauhmoq nyoengxdoengh、lajmbanj nungzyez nungzminz、minzswngh daengj. Dangqnaj caizcwng souhaeuj cienj ndei, gak gaep cwngfuj vanzlij aeu genhciz haed saivaq gvaq saedceij, yiemzsouj gaenxgiemh、gaiqcawz wenj rog, dawzyiemz gaemhanh bingzciengz ceiok, dawz gij cienzngaenz dijbauj de yungh youq demgiengz rengzlaeng hwngfat、ndaw siet soengq danq hawj mingzswngh engq lai .
Gij hobi cwngcwz onjdangq de baujciz mbouj soeng mbouj gaenj, aeu soeng gaenj habdoh. Guenj ndei aen doucab gunghawj hobi, baujciz gvangjyi hobi M2、sindai caeuq sevei yungzswh gveihmoz hableix demmaj, henhoh gij riuzdoengh onjdingh hableix de, daezsang cigsoh yungzswh daegbied dwg gujgenz yungzswh soj ciemq faenhliengh. Deudoeng diuzroen cienzyinx hobi cwngcwz, yungh ndei gij cwngcwz cienzbwh miz cabied、sindai miz mbouj doengz de daengj, dazyinx cienzngaenz douzhaeuj giyez iq saeq、nungzyez nungzminz lajmbanj caeuq dieg gungzhoj bae engq lai, engq ndei bae fugsaeh saeddaej ginghci.
Yaek guh ndei gij hongsaeh bineix, aeu nyinhcaen gvancez Aen Ginghci Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, genhciz aen diuhgoek guhhong youq ndaw onjmaenh gouz baenaj, dawz onjmaenh caeuq baenaj dangguh aen cingjdaej ndeu daeuj gaemdawz, yawjnaek geij diemj lajneix. It dwg roengz rengz hung bae doidoengh hwngfat caetliengh sang. Hwngfat dwg gij giekdaej caeuq giz ceiq youqgaenj gaijgez sojmiz vwndiz guek raeuz. Aeu lai comzrengz gaijgez gij vwndiz hwngfat mbouj bingzyaenx mbouj cungfaen de, hopheux cauhlaeb yendaiva ginghci dijhi, genhciz caetliengh daih’it、yauqik ciemqgonq, coicaenh ginghci gapgyaq bienqndei swnggaep. Aeu aeueiq ginghci gvilwd, gyae’gyawj giethab, saedbauj ginghci yinhhengz youq ndaw duenh hableix, saedyienh ginghci bingzonj demmaj caeuq caetliengh yauqik daezsang dox coicaenh. Ngeih dwg gya rengz gaijgwz hailangh. Gaijgwz hailangh dwg gij banhfap ceiq youqgaenj gietdingh diuzmingh Cungguek ciuhneix, hix dwg gij banhfap youqgaenj saedyienh aen muzbyauh haenqguh“song aen bak bi”. Youq gwnz diemj lizsij hwnjdin moq, aeu caiq gejcuengq swhsiengj, caiq gyalaeg gaijgwz, caiq gya’gvangq hailangh. Aeu fazveih gij cingsaenz baeznduj dajcauh lwgminz，gikcoi gak dieg daj saedsaeh hwnjdin, gamj roemx gamj sawq, gamj bungq saeh ndongj, mboujduenh doinyoengx gaijgwz hailangh baenaj. Sam dwg dawz ndei sam daih hongsaeh ceiq hoj guh satlaeng hingz ndaej cienzmienh hwnqbaenz aenbiengz siujgangh. Aeu faenbied daezok gij roennaemj guhhong caeuq gij fuengfap hengzguh de, baizok mbaw biuj seizgan、mbaw doz roenloh、yienghlawz sien guh, saedbauj gij huxndumj fungyiemj ndaej daengz gaemhanh mizyauq, saedbauj gij yinvu gunggeng duetgungz ndaej guhbaenz caez, saedbauj swnghdai vanzging caetliengh cungjdaej ndaej gaijndei. Sojmiz gij hong raeuz guh, cungj dwg vihliux lwgminz. Aeu genhciz gij hwngfat swhsiengj aeu lwgminz guh cungsim, daj gihbwnj guekcingz guek raeuz bae naemj, caenhrengz bae guh, aenq rengz bae guh, dawz gij saeh cungqvunz ceiq fanzsim ceiq gvansim haenx baez gienh baez gienh gaijgez ndei, coicaenh sevei goengbingz cingqngeih caeuq bouxvunz ndaej cienzmienh hwngfat, sawj gij gwndaenj lwgminz buenxriengz guekgya ndaej hwngfat bi ndei gvaq bi.
Sam、 Gij Genyi Guh Ndei Hongsaeh Cwngfuj 2018 Nienz
Gij yinvu ginghci sevei hwngfat bineix naek dangqmaz.Aeu gaem ndaet gij seizndei gwnz lizsij nanz bungz daihbaj saehcingz cigndaej guh haenx, cingjdaej suenqveh giemgoq、doedyienh cungdenj，netsaed bae guh ndei gak hangh hong.
（It）Haeujlaeg bae doicaenh gaijgwz gij gapgyaq mbiengj gunghawj. Genhciz dawz giz yunghrengz hwngfat ginghci coq youq saeddaej ginghci fuengmienh, laebdaeb guh ndei“sam gemj it gyangq it bouj”, roengz rengz hung genj cwng gemj gvaeh gemj feiq, mboujduenh coisawj gij vanzging guh seng’eiq bienq ndei, caiq gikfat gij rengzhoengh hawciengz cawjdaej, daezsang gij caetliengh hwngfat ginghci.
Hwngfat guh hung rengz doidoengh moq. Guh hung guh ak gij canjnieb comz gyoengq ngamq hwnghwnj, hengzguh gij hengzdoengh hwngfat daihsoqgawq, gya rengz damqra haifat wngqyungh gij yinzgungh cinwngz daih moq, youq yihliuz、ciengxlaux、gyauyuz、vwnzva、dijyuz daengj lai aen lingjyiz lai guh“vangjdoxlienz ＋”. Gyavaiq hwngfat hangznieb fugsaeh seizneix. Hwngfat cinwngz canjnieb, hai’gvangq cinwngz swnghhoz.Yungh gisuz moq、yienghnieb moq、vunqsik moq, roengz rengz hung bae gaijcauh swnggaep gij canjnieb cienzdoengj. Gya rengz doengjgeiq gij canjnieb ngamq hwng. Gya rengz daezsang vangjloz suzdu gemjnoix soucienz, saedyienh gij gvanhdai suzdu vaiq de cwgoemq singz mbanj caez, gya’gvangq gvaengh dieg goenggungh hwnjvangj mbouj soucienz, yienhda gyangqdaemq gij cienz gyadingz、giyez sawjyungh gvanhdai caeuq ciensienq, siubae gij cienzyungh“manyouz”liuzlieng , gij cienzyungh liuzlieng yizdung vangjloz ndaw bi neix ceiq noix gyangqdaemq 30％, hawj cungqvunz caeuq giyez caensaed souh’ik, bang hwnqguh aen cihsoq Cungguek、vangjloz guekak coengh rengz.
Gyavaiq cauhlaeb aen guek ak dajcauh. Doidoengh canjnieb hwngfat, lumjbaenz cizcwngz denlu、yizdung doengsaenq daih daihhaj、fazdunggih feihgih、giceh nwngzyenz moq、caizliuh moq daengj, hengzguh aen gunghcwngz cienhangh cangboiq hothoh mbangnyieg youqgaenj, hwngfat aen bingzdaiz gunghyez vangjdoxlienz, cauhlaeb giz dieg yienghndei“Cungguek Dajcauh 2025”. Daihliengh gemjnoix mbaw cingq cinjhawj gunghyez swnghcanj, gyagiengz gamguenj canjbinj caetliengh. Cienzmienh mbeguh aen hengzdoengh daezswng caetliengh, doicaenh caeuq gij senhcin suijbingz gozci doiqciuq biucinj dabdaengz biucinj, fatyiengz gij cingsaenz boux yienghndei gaenxguh caeuq gij cingsaenz lauxcangh, cauhlaeb aen doih guhhong miz dungxcaiz、dinfwngz raeh、ak cauhmoq, guh ciengz binjcaet gwzming Cungguek dajcauh.
Laebdaeb buqcawz gij gunghawj fouzyauq de. Genhciz yungh gij soujduenh hawciengz fapceih, dawzyiemz caephengz gij fapgvi biucinj vanzbauj、caetliengh、ancienz daengj, vaqgej gij swnghcanj naengzlig laiyawz、raengcawz gij swnghcanj naengzlig doeklaeng de. Bineix caiq gemjnoix gangdiet swnghcanj naengzlig 3000 fanh dunh baedauq, doiqok meizdan swnghcanj naengzlig 1.5 ik dunh baedauq, raengcawz gven dingz gij meizden gihcuj 30 fanh cienvaj doxroengz mbouj hab biucinj de. Gya rengz buqcanj cingsuenq caeuq dauqcungz cingjhab“aen giyez daigyaengj”, anceiq ndei cizgungh caeuq cawqleix ndei dawzcaiq. Gemjnoix gij gunghawj fouzyauq de aeu guh ok cingzyauq moq daeuj.
Gyalaeg bae gaijgwz“cuengqgienz guenjleix fugsaeh”. Cienzmienh hengzguh gij cidu mbawdan gimq guh cinjhaeuj hawciengz daengx guek doengjit. Youq daengx guek haiguh gij gaijgwz“cwnggen cizcau faenliz”, cungdenj dwg miz cizcau le gemj yungh cwnggen, gak loih cwnggen ndaej gemj caenhliengh gemj、ndaej doxhab couh doxhab, caiq atsuk seizgan haibanh giyez. Daih fukdoh sukgemj aen cougeiz cucwz sanghbyauh.ij seizgan saemjbae gunghcwngz hanghmoeg de caiq gemjnoix dingz ndeu. Cienzmienh hengzguh yiengh gamguenj“song seizbienh coucaz、it goenghai”, baenzlawz cungj mbouj hawj gyaj、mauh、rwix、yaez fatmaj baihraih, baenzlawz cungj mbouj hawj bouxcaepfap gwn、lab、gaz、aeu. Haeujlaeg bae doicaenh“vangjdoxlienz ＋ cwngvu fugsaeh”, hawj youq gwnz vangj banhleix saehhangh engq lai, gij itdingh aeu daengz ciengz banh de hix aeu caenhrengz guhdaengz“dan haeuj aen dou ndeu”、“ceiq lai buet mbat ndeu”. Gyagiengz cauhlaeb cwngvu fugsaeh baenz biucinj bae. Haenqrengz doicaenh gaijgwz aen gihci gyoebhab caepfap gihgou, comzrengz gaijgez aen vwndiz lai gyaeuj lai caengz cungzfuk caepfap. Gyavaiq cwngfuj saenqsik hidungj dox lienz dox doeng, dwkdoeng aen dauj saenqsik godog. Cingleix gak cungj cwngmingz banhsaeh cungqvunz caeuq giyez, gij mbouj miz faplwd fapgvi gaengawq de aeu siu caez bae. Hawj vanzging guh seng’eiq bienq ndei couh dwg gejcuengq swnghcanjliz、daezsang naengzlig beijak, aeu buqcawz gazngaih、siucawz fanzcab、cukmaenh roen bingz, demgiengz rengzhoengh hawj hawciengz cawjdaej, demgya fuengbienh hawj cungqvunz lwgminz.
Caiq gemjmbaeu gij gvaeh giyez. Gaijgwz laebndei cwnghcizsui, ciuq aen fuengyiengq sam dangj gyoebbaenz song dangj bae diuzcingj suiqlwd suijbingz, cungdenj gyangqdaemq gij suiqlwd hangznieb dajcauh、hangznieb daehyinh daengj, daezsang aen biucinj daengxbi siugai soqngeg bouxnabgvaeh gveihmoz iq de. Daih fukdoh gya’gvangq aen gvaengh giyez iq saeq yiengjsouh aen cwngcwz gemj buenq cwngsou sojdwzsui. Daih fukdoh daezsang aen soq ceiq sang gaeucawz nabgvaeh gaxgonq giyez cawx yizgi sezbei moq. Saedhengz aen cwngcwz gyoebgyonj dingj mienx giyez youq rogguek canh ndaej. Gya’gvangq aen gvaengh cienzgvaeh youhvei yiengh diegdeih vuzliuz giyez cuengq huq. Laebdaeb hengzguh gij cwngcwz daengz geiz youhvei yiengh diegdeih cwnghcizsui、gisui aen giyez cungzcuj. Daengxbi caiq doiq giyez caeuq goyinz gemjgvaeh 8000 lai ik maenz, coicaenh saeddaej ginghci cienjhingz swnggaep, haenqrengz gikfat gij rengzhoengh hawciengz caeuq gij naengzlig aenbiengz dajcauh.
Daih fukdoh gemjmbaeu diuzrap mbouj dwg gvaehsuiq giyez. Caiq cingleix gveihfan gij soucienz hingzcwng saehnieb singqcaet, diuzdaemq aen biucinj mbangj cwngfujsing gihginh cwngsou. Laebdaeb guh duenh gyangqdaemq gij beijlaeh giyez gyaucienz“haj yiemj it ginh”. Gyangqdaemq gij soucienz hothoh denvangj caeuq gij gyaqcienz soengq dienh boiq dienh, bingzyaenz gyangqdaemq gij gyaqdienh itbuen gunghsanghyez 10％. Gyalaeg gaijgwz gij cidu goengloh soucienz, gyangqdaemq gij cienz gvaq roen gvaq giuz. Gya rengz cingleix cingjdun cunghgai fugsaeh soucienz. Daengxbi aeu bang hawciengz cawjdaej gemjmbaeu diuzrap mbouj dwg gvaehsuiq de 3000 lai ik maenz, gij mbouj hableix de genhgez siubae, gij sang lai de genhgez gyangq roengzdaeuj. Hawj giyez ndaej ndang mbaeu bae guh、comzrengz hwngfat.
（Ngeih）Gyavaiq cauhlaeb aen guekgya cauhmoq. Dawzmaenh aen daihseiq seiqgyaiq lwnz moq gohgi gwzming caeuq canjnieb bengwz, haeujlaeg hengzguh aen canloz aeu cauhmoq doinyoengx hwngfat, mboujduenh gya ak gij naengzlig cauhmoq caeuq gij naengzlig beijak ginghci.
Gyagiengz cauhlaeb aen dijhi cauhmoq guekgya. Gya rengz guh gihcuj yenzgiu、wngqyungh gihcuj yenzgiu caeuq baeznduj cauhmoq, doenghfwngz guh buek hanghmoeg hungnaek gohgi cauhmoq ndeu, ciuq biucinj sang bae hwnqguh aen sizyensiz guekgya. Gikcoi giyez yiendaeuz guh gohgi hanghmoeg hungnaek, daemxcengj gohyenz yensoj、gauhyau caeuq giyez yungzdoeng cauhmoq, gyavaiq cienjvaq wngqyungh gij cwngzgoj cauhmoq. Guekgya gohgi douzhaeuj aeu ngeng coh aen lingjyiz minzswngh, lai roengzrengz yenzgiu ceihleix mokfaenx, doicaenh gungroengz aen nanzgvan fuengz yw bingh hung bingh naek lumjbaenz bingh’aizcwng daengj, sawj gohgi engq ndei bae cauhfuk hawj lwgminz.
Doeksaed caeuq laebndei gij cwngcwz gikcoi cauhmoq. Gaijgwz aen cidu guenjleix gohgi, bingzgyaq gij cikyauq hanghmoeg gohyenz aeu gyavaiq daj yawjnaek bouhloh cienj yiengq yawjnaek gezgoj. Hawj aen doih caeuq vunzcaiz lingxdaeuz cauhmoq miz gienz engq lai, miz gienz guenj vunz、cienz、huq caeuq gietdingh gisuz lohsienq. Doiq boux guh gohyenz rapdawz gohgi gunggvan yinvu hungnaek de, yungh gij cidu cienzhong caeuq banhfap dajciengj lingzvued haenx. Damqra gij fuengfap hawj boux guh hong gohyenz miz gienz gaemmiz caeuq miz gienz ciengzgeiz sawjyungh gohgi cwngzgoj. Gij gvidingh gvicieng gaeuqgeq caeuq gij cwngcwz gikcoi cauhmoq mbouj doxhab de, aeu cagaenj coihgaij feiqcawz bae； gij saehhangh laiyawz gazngaih sanqfat rengzhoengh cauhmoq de, aeu genhgez vuetvak bae.
Coicaenh vunzlai cauhnieb、vunzlai cauhmoq guh ndaej miz suijbingz. Guek raeuz miz gij swhyenz rengzvunz gwnz seiqgyaiq ceiq lai. Neix dwg gij“gvangq fouq”ceiq daih cauhmoq hwngfat. Aeu daezhawj cienz fueng’vih fugsaeh cauhmoq cauhnieb, doicaenh hwnqguh dieg yienghndei“song cauh”, gikcoi giyez hung、gauhyau caeuq gohyenz yensoj hailangh gak loih swhyenz cauhmoq, hwngfat gij ginghci bingzdaiz、ginghci caemhmiz, guhbaenz aen gapgyaq geksik cauhmoq cauhnieb gwnz sienq laj sienq giethab、canj yoz yenz yungh doxdaengh、giyez hung rauh iq yungzhab, dajcauh banj swnggaep“song cauh”. Ndalaeb Guekgya Yungzswh Danhbauj Gihginh, daemxcengj loih giyez cauhmoq ndei de fathengz gujbyau yungzswh, dawz aen gvaengh sawqguh diuz cwngcwz youhvei cienzgvaeh hawj cauhnieb douzswh、denhsij douzswh haenx gya’gvangq daengz daengx guek. Aeu gyalaeg gaijgwz aen dijci vunzcaiz hwngfat, doidoengh swhyenz rengzvunz miz bouhloh riuzdoengh mbouj deng hanhhaed, daemxcengj giyez daezsang gij cienzhong fukleih boux gisuz gunghyinz, gyagiengz dajciengj gij vunzcaiz ginwngz sang de, gikcoi boux bae rog guek doegsaw dauqma guekcoj cauhmoq cauhnieb, haigvangq diuzroen loegsaek hawj vunzcaiz rog guek daeuj Cungguek. Aeu comz gij coengmingz、ligliengh cungqvunz, itdingh ndaej buet ok yiengh Cungguek cauhmoq“gya vaiq” daeuj.
（Sam）Gyalaeg gaijgwz aen lingjyiz dwg giekdaej ceiq youqgaenj de. Swnh aen seizndei gaijgwz hailangh 40 hopbi, doidoengh gaijgwz aeundaej cungbyoengq moq, mboujduenh gejcuengq caeuq hwngfat swnghcanjliz ndawbiengz.
Doicaenh gaijgwz swhcanj guekmiz、giyez guekmiz. Ceiqdingh mbawdan gienzleih、cwzyin、gamguenj bouxokcienz. Gyalaeg giz sawqguh gaijgwz lumjbaenz swhbwnj guekmiz douzswh、ginghyingz guenjleix gunghswh daengj, hawj gij gienz gag guhcawj engq lai. Laebdaeb doicaenh giyez guekmiz bienqndei cungzcuj caeuq giyez cunghyangh gaijbaenz gujfwn gunghswh bae, gyavaiq cauxbaenz aen gapgyaq fazyinz ceihleix hanhhaed mizyauq caeuq aen gihci hawciengz ginghyingz lingzvued yauqlwd sang de, laebdaeb bienq ndang reux miz rengz bae, daezswng gij naengzlig beijak haedsim goeknieb, doidoengh swhbwnj guekmiz guh ak guh ndei guh hung. Onjmaenh doicaenh gaijgwz gij sojyoujci doxgyaux. Doeksaed aen cidu yiengq Daengx Guek Yinzda Cangzveijvei bauq gij cingzgvang guenjleix swhcanj guekmiz. Giyez guekmiz aeu doenggvaq gaijgwz cauhmoq, byaij youq baizgonq hwngfat caetliengh sang.
Daemxcengj giyez minzyingz hwngfat. Genhciz“song aen ngauz mbouj doengh saek di”, genhciz gienzleih bingzdaengj、gihvei bingzdaengj、gveihcwz bingzdaengj, cienzmienh doeksaed gij cwngcwz guhfap daemxcengj yiengh ginghci mbouj dwg gunghyoujci de hwngfat，nyinhcaen gaijgez gij vwndiz doedyienh giyez minzyingz fanjyingj de, genhgez buqcawz gak cungj laengzgaz ndumjndaw. Cauhlaeb cungj gvanhaeh cwng sangh yienghmoq caengaenh cingseuq, laebndei aen gihci hawj giyezgyah caeuqfaenh ceiqdingh gij cwngcwz nangqdaengz giyez. Gikfat caeuq baujhoh gij cingsaenz giyezgyah, hawj giyezgyah engq miz saenqsim, hawj giyez minzyingz youq ndaw rumzlangh hawciengz ginghci foux yungh bonjsaeh.
Laebndei aen cidu canjgienz caeuq aen gihci hawciengz gietdingh gij gyaqcienz yausu. Canjgienz cidu dwg ndaek ringiek hawciengz ginghci sevei cujyi. Yaek aeu baujhoh canjgienz、henhoh iekdingh、doengjit hawciengz、bingzdaengj doxvuenh、goengbingz beijak guh goek dazyinx fuengyiengq, laebndei faplwd fapgvi doxgven. Doiq gak cungj hingzveiz ciemqgienz aeu eifap yiemzsuk cawqleix, doiq gij anqgienh canjgienz cengnauh cingjgouz dauqsaemj de aeu eifap cazcing niujcingq bae. Gyagiengz baujhoh cihsiz canjgienz, saedhengz aen cidu dienzboiz ciemqgienz hawj boux ciemqgienz hit bae. Gyavaiq gaijgwz hawj gisuz、diegdeih daengj yausu youz hawciengz dinghgyaq, gyalaeg gaijgwz gij gyaqcienz loih canjbinj swhyenz caeuq goenggungh fugsaeh, dwkbyoengq hingzcwng gagciemq, fuengzre gagciemq hawciengz. Aeu yungh gij canjgienz baujhoh miz rengz、yausu riuzdoengh doengrat de, hawj rengzhoengh hawciengz caeuq naengzlig dajcauh ndawbiengz doxcanj biufat okdaeuj.
Gyalaeg gaijgwz aen dijci caizsui. Doicaenh gaijgwz vehfaen gij caizcwng saehgienz caeuq ceiok cwzyin cunghyangh nem deihfueng, cagaenj ceiqdingh aen fueng’anq gaijgwz vehfaen souhaeuj, laebndei aen cidu cienjok ceihawj. Laebndei aen dijhi cienzgvaeh deihfueng, onjmaenh bae doicaenh laeb aen fap cienzgvaeh fangzdicanj. Gaijgwz goyinz sojdwzsui. Cienzmienh hengzguh cikyauq guenjleix, sawj gij cienzngaenz caizcwng yungh deng giz ngamj、yungh ndaej ancienz.
Gyavaiq gaijgwz aen dijci ginhyungz. Gaijgwz guhndei aen dijhi ginhyungz fugsaeh, daemxcengj ginhyungz gihgou haigvangq gij ginhyungz yezvu hawj ndeicawq mienh gvangq, gveihfan hwngfat aen ginhyungz gihgou rauh iq deihfueng, comzrengz gaijgez aen vwndiz giyez iq saeq yungzswh nanz、yungzswh bengz. Gyalaeg gaijgwz aen hawciengz swhbwnj lai caengz lai mbaek, doidoengh aen hawciengz caigen、geizhoq hwngfat. Gyahung cungj goengnaengz baujcang gij fungyiemj baujyiemj hawciengz. Gaijgwz aen dijci gamguenj ginhyungz. Gyalaeg gaijgwz, hawj leihlwd veiqlwd youz hawciengz daeuj dingh, baujciz gij veiqlwd yinzminzbi daihdaej onjdingh youq gwnz suijbingz hableix doxdaengh.
Doicaenh gaijgwz dijci ndawbiengz. Gyalaeg gaijgwz cungj cidu ciengxlaux baujyiemj, laebhwnj aen cidu cunghyangh diuzbouj giyez cizgungh gihbwnj ciengxlaux baujyiemj gihginh. Gyalaeg gyoebhab gaijgwz yihyen goenglaeb, doxdaengh doicaenh gaijgwz gyaqcienz ywbingh、cienzhong vunzsaeh、gijyw riuzdoeng、yihbauj ceihawj, daezsang gij caetliengh yihliuz veiswngh fugsaeh, roengz rengz hung gaijgez aen nanzdaez cungqvunz hoj yawjbingh hoj ywbingh. Haeujlaeg doicaenh gaijgwz gyauyuz、vwnzva、dijyuz daengj, caenhliengh sanqfat gij rengzndumj hwngfat hungloet ndawbiengz.
Laebndei aen dijci swnghdai vwnzmingz. Gaijgwz laebndei aen cidu guenjleix swnghdai vanzging, gyagiengz gaemguenj baenzlawz yungh swyenz swnghdai hoenggan, doihengz aen cidu dienzboiz sonjhaih swnghdai vanzging, laebndei aen gihci dienzbouj swnghdai, yungh gij cidu engqgya mizyauq bae baujhoh swnghdai vanzging.
（Seiq）Genhgez guhndei sam daih hongsaeh ceiq hoj guh haenx. Aeu hopheux guhbaenz gij yinvu gunggeng daengxbi, mingzbeg doekdingh gij cwzyin gak fueng, giengzvaq cwngcwz baujcang, guh saed guh ndei gak hangh hong.
Doidoengh fuengzre vaqgej fungyiemj hungnaek yamq baenaj yienhda. Dangqnaj gij ginghci ginhyungz fungyiemj guek raeuz cungjdaej gaem ndaej, aeu goek byai caez ceih, mizyauq siucawz gij huxndumj fungyiemj. Yiemzhaenq dwkceih gij famhfap hozdung mbouj habfap comzcienz、ginhyungz yaeuhlox daengj. Gyavaiq doenggvaq hawciengz nem fapceih bae guh caiqgienz cienj gujgienz caeuq giyez gyan’gyoeb dauqcungz cujhab. Gyagiengz ginhyungz gihgou baihndaw gaemhanh fungyiemj. Giengzvaq cingjdaej suenqveh boiqhab gamguenj ginhyungz, laebndei gij banhfap gamguenj ngaenzhangz rumhngaeuz、ginhyungz vangjdoxlienz、aen gunghswh ginhyungz gaemguj lai daengj, caiq laebndei gamguenj ginhyungz、daezswng yauqnaengz gamguenj. Fuengzre vaqgej gij fungyiemj deihfueng cwngfuj dawzcaiq. Yiemzgimq gak loih hingzveiz famhfap famh gvidingh ciqcaiq、danbauj daengj. Sengj gaep cwngfuj aeu doiq gij caiq diegguenj bonjfaenh rapdawz cungjdaej cwzyin, aen deihfueng cwngfuj sengj gaep doxroengz aeu gag rap gij cwzyin bonjfaenh, gaenxmaenx onjdangq cawqceq gij caiq yienhmiz. Laebndei aen gihci gveihfan deihfueng cwngfuj yungzswh ciqcaiq. Bineix anbaiz deihfueng cienhangh caigen 1.35 fanh ik maenz, beij bi’gvaq demlai 5500 ik maenz, sien daemxcengj gij hanghmoeg cingqcaih hwnq de bingzonj hwnqguh gonq, hableix gya’gvangq aen gvaengh sawjyungh cienhangh caigen. Ginghci guek raeuz cungjdaej lij ndei, cwngcwz fuengfap lai, vanzcienz ndaej souj maenh diuz daejsienq mbouj fatseng cungj fungyiemj baenzroix.
Gya rengz dawzcinj duetgungz. Bineix caiq gemjnoix gij vunz gungzhoj lajmbanj 1000 fanh vunz doxhwnj, guhbaenz bang 280 fanh vunz senj dieg an’gya duetgungz.Haeujlaeg doicaenh bang gij canjnieb、gyauyuz、ndangcangq、swnghdai caeuq vwnzva daengj duetgungz, bouj caez gij benjdinj giekdaej sezsih caeuq goenggungh fugsaeh, gyagiengz Baihdoeng Baihsae banggungz gapguh caeuq duigouj bangcoengh, ciet hoj mbouj lumz ciet sim mbouj lumz son raeh, hawj gyoengqde gag rox laemxsim bae baedrengz ra gwn. Giengzvaq daemxcengj dieg gig gungzhoj, cunghyangh caizcwng caiq demgya gij douzhaeuj banggungz caeuq mizgven cienjok ceihawj de aeu ngeng coh dieg gig gungzhoj. Doiq gij vunz gungzhoj daegdingh de lumjbaenz bouxgeq、bouxndangcanz、bouxbinghnaek daengj, aeu yawj gak ranz gak boux mbouj doengz doeksaed banhfap bae baujcang. Ndaw mboengq gunggeng de duet gungz mbouj duet cwngcwz, gij vunz ngamq bienq gungz caeuq gij vunz dauq bienq gungz de aeu gibseiz nabhaeuj boux deng bang bae. Gyagiengz cingjhab caeuq cikyauq guenjleix gij cienzngaenz banggungz. Youq aen gvaengh banggungz de cienhangh ceihleix gij vwndiz nduknaeuh caeuq cozfungh, gaijndei gij fuengsik gaujhaed gamduk. Genhciz aen biucinj duetgungz seizneix, saedbauj cindu caeuq caetliengh, hawj vunzlai caencingq rox daengz hong duetgungz guh ndaej ndei、dingj ndaej lizsij cazniemh.
Doicaenh gij hong fuengzceih uqlah ndaej miz cingzyauq engq daih. Gyamaenh gij cwngzgoj yiengh hong henhoh mbwn lamz, bineix baizcuengq wyangjvaliuz、danyangjvavuz soqliengh aeu doekdaemq 3％, gij naedfaenx（PM2.5）dieg cungdenj de noengzdoh aeu laebdaeb doekdaemq. Doidoengh gangdiet daengj hangznieb gaijcauh baenz baizcuengq gig noix bae. Daezsang aen biucinj baizcuengq uqlah, saedhengz hanhgeiz dabdaengz biucinj. Mbeguh cienhangh ceihleix gij cidaehhuq yungh caizyouz、gij ruz mauhgvaq biucinj baizcuengq, laebdaeb raengcawz ci gaeuqgat. Haeujlaeg doicaenh fuengzceih raemx、namh uqlah, bineix vayoz yungh yangj soqliengh、anhdan baizcuengq soqliengh aeu doekdaemq 2%. Gyoebhab ceihleix diegdah caeuq dieghaij gaenh hamq cungdenj, cienzmienh cingjceih raemxgyuek raemxhaeu. Gya rengz hwnqguh gij sezsih cawqleix raemxuq, laebndei gij cwngcwz soucienz. Gyagiengz faenloih cawqceq huqfeiq baenzndaek caeuq nyapnyaj, yiemzgimq gij nyapnyaj guekrog haeuj ndaw guekgyaiq daeuj. Gyagiengz baujhoh caeuq coihfuk swnghdai hidungj, cienzmienh vehdingh caemhcaiq souj maenh diuz sienqhoengz baujhoh swnghdai, cauhndoeng ndaej ik moux doxhwnj, gij reihnaz sawqguh lwnz ndaem daengx raeq de demgya daengz 3000 fanh moux, gya’gvangq aen gvaengh baujhoh caeuq hoizfuk diegdingh diegcumx, gyalaeg sawq guh gaijgwz aen dijci guekgya gunghyenz. Dawzyiemz gaemhanh dienz haij cauh dieg. Dawzyiemz caepfap vanzging caeuq gyaepcaz cwzyin. Raeuz aeu gaemfwngz caez guh, cauhlaeb aen Cungguek gyaeundei mbwn lamz、deih heu、raemx saw.
（Haj）Haenqrengz saedhengz aen canloz saenqhwng lajmbanj. Gohyoz ceiqdingh gveihva, laebndei aen dijci gihci singz mbanj yungzhab hwngfat, baengh gaijgwz cauhmoq bae guh coek gij rengz doidoengh moq lajmbanj.
Doicaenh gaijgwz gij gapgyaq mbiengj gunghawj nungzyez. Coicaenh cauhmoq hwngfat nungz、linz、muz、yizyez caeuq hangznieb faenceh, gyavaiq cauhlaeb gij nungzyez canjyezyenz yienhdaih caeuq gij dieg nungzcanjbinj miz daegsaek miz youhsi de. Genhciz aen cohyiengq daezsang caetliengh, onjdingh caeuq gaijndei swnghcanj haeuxgwn. Gyavaiq siuvaq gij haeuxgwn daenzcang. Hwngfat hangznieb gyagoeng nungzcanjbinj. Lai demgya gij reihnaz biucinj sang de 8000 fanh moux doxhwnj、gij reihnaz mbaet raemx guenq raemx yauqlwd sang de 2000 fanh moux. Gungganq yiengh ginghyingz cawjdaej moq, hawj nungzyez engq lai ndaej baengh gohgi bae hwngfat, hawj nungzyez gizgiz cungj yungh gihgai daeuj guh, hawj gij nungzhoh iq de engq ndei youz ndawbiengz fugsaeh. Gujli daemxcengj doengh boux vunzhong ma ranz、dacunghconh bizyezswngh、bouxguhhong gohgi、bouxbing doiok bingdoih caeuq gunghsangh giyez daengj bae guh gij nungzyez hab seizdaih、hwngfat hangznieb moq vunqsik moq lajmbanj. Haeujlaeg doicaenh“vangjdoxlienz ＋ nungzyez”, coicaenh it ngeih sam canjnieb lajmbanj yungzhab hwngfat.
Cienzmienh gyalaeg gaijgwz lajmbanj. Ceiqdingh gij cwngcwz lwnz daihngeih dieg cingzbau daengz geiz le caiq gyaraez 30 bi. Damqra gaijgwz faen nda gij gienzciemqmiz、gienzswhgwz、gienzsawjyungh diegranz. Gaijndei gij banhfap guenjleix reihnaz ciemq bouj doxdaengh, laebhwnj aen gihci hamj sengj habdangq diuzcingj gij cijbyauh saen demgya reihnaz、gij cijbyauh lwyawz yungh dieg dajhwnq singz mbanj demgya gemjnoix dox lienzhaeh, soj ndaej souik cienzbouh yungh youq duetgungz gunggeng caeuq daemxcengj saenqhwng lajmbanj. Gyalaeg gaijgwz soucwk haeuxgwn、cizdij canjgenz、cizdij linzgenz、linzgih linzcangz guekmiz、nungzgwnj、gungsiuhse daengj, sawj nungzyez lajmbanj gizgiz miz rengzhoengh.
Doidoengh gak hangh saehnieb lajmbanj cienzmienh hwngfat. Gaijndei gij goenggungh fugsaeh lajmbanj lumjbaenz yihliuz、gyauyuz、vwnzva daengj. Gaijndei giekdaej sezsih lumjbaenz gung raemx、gung dienh、saenqsik daengj, ngamq guh ngamq gaij goengloh lajmbanj 20 fanh goengleix. Yamqonj yungh sam bi cingjceih aen vanzging vunz youq lajmbanj, doicaenh coengz goekgaen bae gaijbienq diengzhaex caeuq soucomz cawqleix nyapnyaj. Coicaenh lajmbanj gaijbienq fungsug gaeuq. Laebndei aen dijhi yungh gagguenj、fapceih、son guh vunzndei caez bae ceihleix lajmbanj. Haenqrengz gungganq vunzcaiz saenhwng lajmbanj. Raeuz aeu genhciz byaij diuzroen saenqhwng lajmbanj yiengh sevei cujyi miz gij daegsaek Cungguek, gyavaiq saedyienh nungzyez lajmbanj yendaiva.
（Roek）Netsaed doicaenh aen canloz ranghdieg doxdaengh hwngfat. Laebndei gij cwngcwz ranghdieg hwngfat, doicaenh gihbwnj goenggungh fugsaeh bienq bingzyaenz bae, cugbouh sukiq singz mbanj hwngfat doxca, cungfaen fazveih gij ak gvaq vunz caeuq rengzndumj gak dieg.
Cauxbaenz aen gapgyaq geksik moq ranghdieg hwngfat. Gyagiengz daemxcengj dieg doenghbaez guh gwzming、dieg minzcuz、dieg henz guek、dieg gungzhoj guh gaijgwz hwngfat. Aeu gejsoeng Baekging yiengh goengnaengz mbouj dwg gingsingz de guh cungdenj doidoengh Baekging Denhcinh Hozbwz guhdoih hwngfat, daj giek sang bae gveihva、biucinj sang bae cauhlaeb Yungzanh Sinhgih. Aeu swnghdai ciemqgonq、saekloeg hwngfat bae dazyinx ranghdieg ginghci Dahcangzgyangh hwngfat. Fatbouh saedhengz aen gveihva ganghyau hwngfat Yez Gangj Au Davanhgih, cienzmienh doicaenh Diegndaw caeuq Yanghgangj、Aumwnz gapguh caezleih. Ceiqdingh aen yigen moq ceijyinx daih haifat Baihsae, doeksaed gij banhfap saenqhwng dieggoek gunghyez gaeuq lumjbaenz Doengbaek daengj, laebdaeb doidoengh dieg Cungqgyang hwnghwnj, daemxcengj dieg Baihdoeng daiqdaeuz hwngfat gonq.Lai rengz daemxcengj giz dieg baengh swhyenz de guh ginghci cienjhingz. Coicaenh yiengh ginghci dieghaij hungcoek, genhgez henhoh gij gienzik dieghaij guekgya.
Daezsang gij caetliengh baenz yiengh hawsingz moq. Bineix gij vunz haeuj singz an’gya de caiq gya 1300 fanh vunz, gyavaiq gij vunz daj nungzyez senj okdaeuj de bienqbaenz vunz ndawsingz. Engq ndei gveihva hawsingz, hwngfat goenggungh gyaudoeng ciemqgonq, laebndei gij sezsih fugsaeh fuengbienh lwgminz lumjbaenz hawbyaek、dieg daengx ci daengj, gyavaiq cauhlaeb gij sezsih ndei byaij mbouj miz gaz. Miz bouhloh bae doicaenh gaijcauh“aen mbanj ndaw singz”、aen siujgih gaeuq, laebndei gij sezsih boiqdauq de, gikcoi giz miz diuzgen de gya cang dendih. Gyagiengz hwnqguh gij guenjvangx baiz raemxdumh、roen guenj gyoebhab lajnamh、aen singz haijmenz daengj. Bienqbaenz yiengh hawsingz moq ceiq youqgaenj dwg vihliux vunz, fugsaeh aeu engqgya saeqnaeh、guenjleix aeu engqgya hab vunzsingq, hawj bouxboux cungj miz gihvei goengbingz bae hwngfat，hawj gihminz gwndaenj ndaej fuengbienh、youq ndaej cwxcaih.
（Caet）Gaenxmaenx gya’gvangq siuyungh caeuq coicaenh douzswh mizyauq. Swnh’wngq gij aeuyungh bienqvaq moq gihminz gya’gvangq siuyungh, coengz diuzcingj gapgyaq demgya douzswh bae ngeixnaemj, cauxbaenz cungj sinzvanz ndei gapgyaq gunghawj bienq ndei caeuq cungjdaej aeuyungh habdoh gya’gvangq.
Demgiengz gij giekdaej cozyung siuyungh coicaenh ginghci hwngfat. Doicaenh siuyungh swnggaep, hwngfat yienghnieb moq vunqsik moq siuyungh. Caiq gya raez gij cwngcwz hawj cienzgvaeh cawx ci nwngzyenz moq youhvei sam bi, cienzmienh siubae aen cwngcwz hanhhaed gij ci dieg wnq cienjnyiengh haeuj bonjdieg. Daemxcengj ligliengh ndawbiengz lai gunghawj gij fugsaeh lumjbaenz yihliuz、ciengxlaux、gyauyuz、vwnzva、dijyuz daengj. Cauhlaeb dieg yienghndei cingjdaej suenqveh youzbyaij daengx ranghdieg, gyangqdaemq gij gyaqcienz mbaw biuq youz aen gingjgih cungdenj goenggya. Doidoengh gwnz vangj dajcawx、vaiqsoengq cangqheiq hwngfat. Doiq gak loih hingzveiz ciemqhaih gij gienzik bouxsiuyungh, aeu ciuqfap fadceih、baenzlawz cungj mbouj nyiuz gyoengqde.
Hawj douzswh doiq gaijndei gij gapgyaq gunghawj miz ok cozyung ceiq youqgaenj. Bineix yaek guhbaenz douzswh dietloh 7320 ik maenz、douzswh goengloh caeuq gwnzraemx daehyinh 1.8 fanh ik maenz baedauq, douzswh gij suijli cingqcaih hwnqguh de dabdaengz fanh ik maenz. Hwnqguh giekdaej sezsih hungnaek yaek laebdaeb ngeng coh dieg Cungqgyang dieg Baihsae. Bae guh aen gunghcwngz doiq gij gisuz hungnaek guh lwnz gaijcauh swnggaep moq. Gij douzswh ndaw cunghyangh yawhsuenq anbaiz 5376 ik maenz, beij bi’gvaq demgya 300 ik maenz. Doeksaed gij cwngcwz guhfap gikcoi ndawbiengz douzswh, youq dietloh、minzhangz、youz heiq、densin daengj lingjyiz doi ok buek hanghmoeg ndaej yinx vunz ciengj guh ndeu, bietdingh aeu hawj gij swhbwnj ndawbiengz ndaej haeujbae、ndaej hwngfat.
（Bet）Doidoengh cauxbaenz aen gapgyaq geksik moq cienzmienh hailangh. Caiq gya’gvangq aen gvaengh caeuq caengzmbaek hailangh, hawj gij gapgyaq baijbouh caeuq dijci gihci hailangh engq ndei, aeu gij hailangh suijbingz sang bae doidoengh hwngfat caetliengh sang.
Doicaenh gozci gapguh“it rangh it loh”. Genhciz caezyaeng caezguh caezyungh, doeksaed gij cwngzgoj“It Rangh It Loh”Gozci Gapguh Gauhfungh Lundanz. Doidoengh hwnqguh diuz roen hung gwnz gozci, gyalaeg youq henz roen daih doenggvan gapguh. Gya’gvangq gozci swnghcanj naengzlig gapguh, yienghneix daiqdoengh Cungguek dajcauh caeuq Cungguek fugsaeh byaij okbae. Sawj gij gapgyaq doiq rog douzswh bienq ndei. Gya rengz hailangh Baihsae、Diegndaw caeuq henz guek, daezsang gij suijbingz hwngfat giz ginghci gapguh henzguek hamjguek, gya’gvangq hoenggan moq hailangh gapguh.
Coicaenh vaisangh douzswh onjdingh demmaj. Gyagiengz caeuq gij gveihcwz ginghci mouyiz gozci doenghengz de doxciep, cauhlaeb gij vanzging guh seng’eiq miz seiqgyaiq suijbingz. Cienzmienh hai gij hangznieb dajcauh itbuen de, hai doengh gij lingjyiz lumjbaenz densin、yihliuz、gyauyuz、ciengxlaux、ci yungh nwngzyenz moq daengj. Miz gonqlaeng bae hai gij hawciengz lumjbaenz yinzhangzgaj cingsuenq daengj, mbouj caiq hanhhaed aen gvaengh ginghyingz cungj baujyiemj ginghgij gunghswh swhbwnj guekrog, cuengqsoeng roxnaeuz siubae hanhhaed gij gujfwn beijlaeh swhbwnj guekrog lumjbaenz yinzhangz、cwnggen、gihginh guenjleix、geizhuq、ginhyungz swhcanj guenjleix gunghswh daengj, doengjit aen biucinj swhbwnj ndawguek rogguek haeuj hawciengz ngaenzhangz. Hawj bouxdouzswh rog gyaiq aeu leihyinh ndaw gyaiq caiq douzswh ndaej yienzgeiz nabgvaeh. Hawj gij bouhloh banh aen giyez swhbwnj guekrog de bienq genjdanh bae, hongsaeh seng’eiq bwh’anq caeuq gunghsangh daenghgeiq“youq giz ndeu banhleix”. Cienzmienh ciuqguh doigvangq gij gingniemh giz sawqguh swyouz gaicawx, damqra hwnqguh aen gangjgouj swyouz gaicawx, dajcauh diegsang moq gaijgwz hailangh.
Gyamaenh yiengh seiqdaeuz doiq rog gaicawx onjdingh coh ndei de. Sawj cuzgouj saenqyungh baujyiemj guh ndaej engq gvangq, cingjdaej doenggvan seizgan caiq gemjnoix sam faenh cih it. Gaijgwz aen gihci hwngfat fugsaeh mouyiz. Gungganq gaicawx canjnieb moq vunqsik moq. Doidoengh gyagoeng gaicawx faen mbaek senj bae dieg Cungqgyang dieg Baihsae. Gaenxmaenx gya’gvangq cingouj, banh ndei Gaiq Daih’it Cungguek Gozci Cingouj Bozlanjvei, gyangqdaemq gij gvanhsui cingouj lumjbaenz giceh、mbangj doxgaiq ngoenznaengz yungh daengj. Raeuz aeu yungh ligdoh engq daih bae hailangh hawciengz, bae coicaenh canjnieb swnggaep caeuq gaicawx ndaej doxdaengh hwngfat, hawj bouxsiuyungh miz senjleh engq lai.
Coicaenh gaicawx caeuq douzswh bienq swyouz bienq fuengbienh bae. Cungguek giendingh mbouj bienq doicaenh ginghci cenzgiuzva, henhoh swyouz gaicawx, nyienh caeuq fueng mizgven de itheij caeux di damzbuenq lai mbiengj gaicawx, caeuxdi gietsat aen damzbuenq yaengdingh Ranghdieg Cienzmienh Ginghci Hujgeiq Gvanhaeh, gyavaiq cauhlaeb Yadai Swmougih caeuq Dunghya Ginghci Gungdungzdij. Cungguek cawjcieng doenggvaq bingzdaengj doxyaeng gaijgez gaicawx doxdawz, fanjdoiq mouyiz baujhu cujyi, genhgez henhoh gij gienzik habfap bonjfaenh.
（Gouj）Daezsang aen suijbingz baujcang caeuq gaijndei gij gwndaenj lwgminz. Aeu youq gwnz giekdaej hwngfat bae lai banh gij saedsaeh ik lwgminz、lai gaijgez gij saehhoj gwndaenj lwgminz, souj maenh diuz daejsienq gij gwndaenj lwgminz, mboujduenh hawj cungqvunz lwgminz lai roxnyinh aeundaej、 lai roxnyinh vuenyungz、lai roxnyinh ancienz.
Comzrengz coicaenh couhnieb cauhnieb. Gyagiengz cienzfueng’vih bae fugsaeh goenggungh couhnieb, daih gveihmoz bae guh cizyez ginwngz beizyin, yungh“vangjdoxlienz ＋”bae hwngfat yienghsik couhnieb moq.Bineix miz 820 lai fanh boux dayozswngh bizyez, dwg gwnz lizsij bizyez vunzsoq ceiq lai ndeu, aeu coicaenh lai diuz roenloh couhnieb, daemxcengj aeu cauhnieb daiqdoengh couhnieb. Maenhsaed anbaiz ndei、guenj ndei caeuq baujcang ndei bouxbing doiq ok bingdoih. Gya rengz bae bangcoengh boux hoj ra ndaej hong guh de lumjbaenz bouxndangcanz daengj. Lai hawj nungzminzgungh ra ndaej hong, cienzmienh ceihleix gij vwndiz niengqyiemq cienzhong. Aeu laebndei yiengh gihci doxyaeng lauzdung gvanhaeh, mbouj hawj aeu vunz yawj mbouj hwnj mehmbwk caeuq ndangfaenh daemq, hawj gij couhnieb engqgya goengbingz、engqgya cungfaen bienqbaenz diemj rongh guek raeuz hwngfat.
Yamqonj daezsang gij souhaeuj suijbingz gihminz.Laebdaeb daezsang gihbwnj yangjlaujginh hawj boux duiyouh caeuq daezsang gihcuj yangjlaujginh hawj gihminz singz mbanj. Hableix diuzcingj aen biucinj cienzhong ceiq daemq ndawbiengz. Laebndei gij cidu cienzhong caeuq cinhdez bujdez gihgvanh saehnieb danhvei, aeu lai coq hawj dieg ganhoj、aen gang’vih daegbied de. Daezsang diuz sienq sou aeu goyinz sojdwzsui, demgya gaeucawz gij cienzyungh cienhangh de lumjbaenz lwgnyez doegsaw、yw bingh hung daengj, hableix gemjmbaeu diuzrap, gikcoi cungqvunz lwgminz doenggvaq guhhong bae lai ndaej souhaeuj、gwndaenj mbouj you.
Hwngfat cungj gyauyuz goengbingz youh miz caetliengh de. Doidoengh gij yivu gyauyuz singz mbanj baenz cingjdaej hwngfat, gyauyuz douzhaeuj laebdaeb ngeng coh dieg gungzhoj caeuq hothoh mbangnyieg. Caencingq gemjdaemq aen beijlwd hagseng lajmbanj buenqbangh doiq hag, cagaenj siucawz“aen ban hagseng lai”ndaw singz, comzrengz gaijgez aen vwndiz hagseng cunghyoz siujyoz youq baihrog deng hag lai. Minzcuz maqmuengh youq laeng lwgnyez, ndawranz youq laeng lwgnyez. Aeu lai diuz roenloh demgya yozcenz gyauyuz swhyenz, lailai gvansim caeuq gunggan doengh boux lauxsae son nyez iq, yungh gij soujduenh saenqsikvaq lumjbaenz vangjdoxlienz daengj, gyagiengz gamguenj daengx aen bouhloh dak guenj dak son lwgnyez, itdingh aeu hawj bohmeh lwgnyez cuengqsim ansim. Haenqrengz hwngfat cizyez gyauyuz, daemxcengj caeuq gveihfan ligliengh ndawbiengz bae banh cizyez gyauyuz. Doicaenh bujgiz duenh gyauyuz gauhcungh. Aeu gij aeuyungh ginghci sevei hwngfat guh fuengyiengq dazyinx, gaijndei gij gapgyaq gauhdwngj gyauyuz, gyavaiq cauhlaeb gij daihhag caeuq yozgoh seiqgyaiq suijbingz, daemxcengj dieg Cungqgyang dieg Baihsae cauhlaeb gij dayoz miz daegsaek、suijbingz sang. Youh caiq guh gij giva cienmonz ciu hagseng lajmbanj caeuq dieg gungzhoj. Hwngfat minzcuz gyauyuz、daegbied gyauyuz、laebdaeb gyauyuz caeuq vangjloz gyauyuz. Gyagiengz cauhlaeb aen doih lauxsae caeuq daudwz、cozfungh lauxsae. Aeu gyavaiq doicaenh gij gyauyuz yienhdaih, banh ndei yiengh gyauyuz lwgminz habhoz, hawj bouxboux cungj miz gihvei bingzdaengj doenggvaq doegsaw gaijbienq minghyinh bonjfaenh、guhbaenz aen siengjmuengh ciuhvunz.
Saedhengz aen canloz Cungguek cangqheiq. Daezsang gij suijbingz baujcang gihbwnj yihbauj caeuq bingh hung baujyiemj, aen biucinj caizcwng bangbouj gihminz gihbwnj yihbauj moix vunz bingzyaenz caiq demgya 40 maenz, dingz ndeu yungh youq bingh hung baujyiemj. Gya’gvangq aen gvaengh youq sengj wnq dieg wnq ywbingh ndaej cigsoh gietsuenq cienz ywbingh, dawz gij yihyen caengzgiek caeuq boux nungzminzgungh okrog guhhong、boux couhnieb cauhnieb daj dieg wnq daeuj daengj cienzbouh nab haeujdaeuj. Haenqrengz gungganq canghyw, gyagiengz cauhlaeb aen doih boux canghyw rox yw bingh ciengz raen、boux canghyw yw bingh lwgnyez, doicaenh faengaep yawjbingh ywbingh caeuq boux canghyw ciemdingh habdoengz fugsaeh gyadingz. Laebdaeb daezsang aen biucinj moix vunz bingzyaenz caizcwng bangbouj gihbwnj goenggungh veiswngh fugsaeh ginghfei. Genhciz yawhfuengz guhcawj, gya rengz gaemhanh fuengzre bingh naek bingh hung. Gaijndei fugsaeh mehmbwk lwgnyez baujgen. Daemxcengj ciepswnj、cauhmoq、hwngfat aen saehnieb cunghyihyoz.Cauhmoq gij fuengsik gamguenj gijgwn gijyw, lailai yungh vangjdoxlienz、daihsoqgawq daeuj daezswng gamguenj yauqnaengz, gyavaiq guhbaenz sojmiz seiz guh louz riz、saenqsik ndaej ragoek, hawj gij canjbinj miz vwndiz de mbouj miz dieg ndoj、boux cauhguh siugai de nanz deuz ok fanvangx faplwd, hawj bouxsiuyungh cawx ndaej cuengqsim、gwn ndaej ansim. Guh ndei gij hong couzbanh Baekging Auyinvei Seizdoeng、Auyinvei Bouxndangcanz Seizdoeng, lai diuz roenloh demgya gij ciengzdieg caeuq sezsih hawj lwgminz raeuz lienhndang. Cungqvunz lwgminz ndang cangq sim hai、sim sienh doxbae, guekgya bietdingh yaek hwngfat fwdfwd、byaij yiengq mwnhoengh fouqak.
Engq ndei bae gaijgez gij vwndiz ranzyouq cungqvunz. Haiguh aen giva gunggeng moq sam bi gaijcauh ranzdiengz, bineix haigoeng 580 fanh dauq. Gya rengz baujcang ranzco goenggungh, doiq doengh ranz souhaeuj daemq caengz miz ranz youq de, wnggai bauj couh bauj, dawz boux cizgungh ngamq couhnieb caengz miz ranzyouq、gyoengq vunz daj dieg wnq daeuj guhhong hab diuzgen de nabhaeuj ndaw gvaengh baujcang bae. Genhciz yiengh dinghvih ranz dwg aeu daeuj youq、mbouj dwg aeu daeuj rih canh cienz, doeksaed deihfueng cawjdaej cwzyin, laebdaeb hengzguh yiengh diuzgung miz cabied de, laebhwnj laebndei gij gihci ciengzgeiz mizyauq, coicaenh hawciengz fangzdicanj ndaej bingzonj cangqheiq hwngfat. Daemxcengj gihminz ciuq bonjfaenh aeuyungh cawx ranzyouq, gungganq aen hawciengz co ranzyouq, hwngfat gij ranzyouq canjgienz caemhmiz. Gyavaiq laebhwnj gij cidu lai aen cawjdaej gunghawj ranzyouq、lai diuz roenloh baujcang ranzyouq、ndaej cawx ndaej co ranzyouq, hawj gyoengq lwgminz caeuxdi guhbaenz youqonj cuengqsim.
Gyagiengz daiz daej baujcang gij gwndaenj lwgminz. Yamqonj daezsang aen biucinj singz mbanj dihbauj、ndawbiengz gouqbang、fujsiz daihndei daengj. Gaenxmaenx wngqdoiq cungqvunz nienzgeij gapgyaq bienq geq, hwngfat gij yiengh youq ranz、segih caeuq doxbang ciengxlaux, doicaenh yw ciengx giethab, sawj yangjlaujyen guh ndaej engq ndei. Gvansim bangcoengh boux lwgnyez louz youq lajmbanj de. Gyagiengz baujcang boux lwgnyez hojcawq singz mbanj. Guhndei gij hong daihndei naicam bangcoengh bouxbing sieng canz caeuq vunz ndawranz lezsw. Gya rengz fugsaeh hawj bouxndangcanz ndeidauq. Laeb caezcienz aen dijhi ndawbiengz gouqbang, daemxcengj yiengh saehnieb goeng’ik swnzsienh hwngfat. Caenhcingz caenhrengz guh ndei gij hong daiz daej, mbouj aenvih saeh hoj guh cix doi deuz, mbouj aenvih saeh iq cix mbouj guh, aeu hawj doengh boux deng gungz de cungj ndaej ndawbiengz gvansim caeuq bangcoh.
Cauhlaeb aen gapgyaq geksik ndawbiengz ceihleix caezlaeb、caezceih、caezyungh. Laebndei aen cidu cungqvunz caengzgiek gagguenj, gyagiengz segih ceihleix.Fazveih ndei gij cozyung ginzdonz cujciz lumjbaenz gunghvei、Gungcinghdonz、fulenz daengj. Coicaenh doengh gij sevei cujciz、hongsaeh ciennieb ndawbiengz、gagnyienh fugsaeh ndaej cangqheiq hwngfat. Gyagiengz cauhlaeb aen dijhi sevei saenqyungh. Laebndei aen dijhi fugsaeh faplwd goenggungh, doeksaed gij cwzyinci hawj bouxboux hagrox faplwd. Cauhbaenz cungj yienghndei gingqcungh mehmbwk、gvansim lwgnyez、aeueiq bouxgeq、gyaezhoh bouxndangcanz. Guhndei aen gihci lai fuengmienh vaqgej gij mauzdun cengnauh ndawbiengz. Cauhmoq gij fuengsik hongsaeh sinfangj, ciuqfap gibseiz gaijgez gij iugouz hableix cungqvunz. Dawzyiemz doeksaed gij cwzyin ancienz swnghcanj, roengzsim naenxhaed gij saehhux hungnaek、daegdaih hungnaek. Guhndei gij hong deihdoengh、diensiengq、deihcaet daengj, daezsang gij naengzlig fuengzcai gemjcai gouqcai. Doicaenh hwnqguh aen Cungguek an’onj, yiemzmaed fuengzre caeuq genhgez dwkceih yiengh saeh bauqlig dwglau, ciuqfap haiguh gij cienhangh doucwngh dwkceih boux vaih biengz、boux hengz ak doeg, fadceih gij hozdung famhfap famhcoih lumjbaenz guhcaeg、ciengjgiep、yaeuhlox、coujndauq、guhdoj、gaidoeg gwndoeg daengj, cingjceih gij vwndiz doedyienh de, lumjbaenz densin vangjloz yaeuhlox、ciemqfamh saenqsik gunghminz、gwnzvangj cienzsiu daengj, henhoh guekgya ancienz caeuq goenggungh ancienz.
Vih hawj yinzminz ndaej gvaq saedceij ndei daezhawj cingsaenz haeuxgwn lailai. Aeu fatyiengz gij vwnzva cienzdoengj maenhndei Cungguek, ciepswnj gij vwnzva gwzming, hwngfat gij vwnzva senhcin sevei cujyi, gungganq caeuq hengzguh gij haedsim gyacizgvanh sevei cujyi. Gyagiengz cauhlaeb swhsiengj daudwz caeuq cauhlaeb gij cingsaenz vwnzmingz gyoengq vunzlai. Gyavaiq cauhlaeb aen cezyoz sevei gohyoz miz gij daegsaek Cungguek, coisawj vwnzyi cozbinj mwnhoengh, hwngfat sinhvwnz okbanj、gvangjbo denyingj densi、dangjanq daengj.Gyagiengz baujhoh leihyungh vwnzvuz caeuq baujhoh ciepswnj vwnzva yizcanj.Laebndei aen donzdij comz vunzak yienghmoq. Roengzrengz cauhlaeb gij neiyungz vangjdoxlienz. Haeujlaeg saedhengz aen gunghcwngz vwnzva ikleih beksingq, gungganq gij fuengsik ginghyingz vwnzva yienghmoq, gyavaiq hwngfat canjnieb vwnzva. Iudaeuz yuqheuh cienzminz doegsaw, cauhlaeb aenbiengz gaenx hagsib. Gyalaeg gij yinzvwnz Cungguek rogguek gyaulouz. Raeuz aeu doenggvaq yiengh vwnzva sevei cujyi miz gij daegsaek Cungguek mwnhoengh hwngvuengh neix, daeuj gietcomz gij cingsaenz ligliengh hungdaih bae guhbaenz minzcuz fukhwng.
Gak boux daibyauj！
Haeuj daengz seizdaih moq, hongsaeh cwngfuj youq ndaw bimoq aeu miz yienghsiengq moq cingzcik moq. Aeu laebmaenh“seiq aen eiqsik”, giendingh“seiq aen gagsaenq”, genhgez henhoh aen diegvih gyangsim Siz Ginbingz cungjsuhgi, genhgez henhoh Dangjcunghyangh gienzvi caeuq gyonjcomz doengjit lingjdauj, doeksaed gij iugouz cienzmienh coengz yiemz guenj Dangj, gyagiengz gensez cwngfuj bonjndang, haeujlaeg doicaenh cienjbienq cwngfuj ciznwngz, cienzmienh daezswng gij suijbingz hengzguh cizcwz, daezgung gij fugsaeh caetliengh ndei yauqlwd sang hawj yinzminz.
Cienzmienh doicaenh ciuq Fapgoek bae yungh gienz、ciuq faplwd guh guenjleix. Dawzyiemz ciuqsouj Fapgoek faplwd, gyavaiq cauhlaeb aen cwngfuj fapceih, dawz cwngfuj hozdung nab haeuj diuz roen fapceih bae. Genhciz dawzyiemz gveihfan goengcingq vwnzmingz caepfap, miz gienz mbouj ndaej luenhyungh, yungh gienz dingh deng gamduk. Gak gaep cwngfuj aeu ciuqfap ciepsouh doengzgaep yinzda caeuq aen cangzveijvei de gamduk, gagrox ciepsouh yinzminz cwnghez guh minzcuj gamduk, gagnyienh ciepsouh sevei caeuq yizlun gamduk, nyinhcaen dingqaeu gij yigen yinzda daibyauj、cwnghez veijyenz, dingqaeu gij yigen minzcuj dangjbai、 Gunghsanghlenz、boux mizmingz mbouj haeuj dangjbai de caeuq gak yinzminz donzdij. Cwngfuj aeu gangj daengz guh daengz, baenzlawz cungj mbouj ndaej“guen moq mbouj leix soqgaeuq”. Cienzmienh doicaenh goenghai hongsaeh cwngci. Doihengz aen cidu cwngfuj ndalaeb faplwd guvwn. Genhciz gohyoz、minzcuj、ciuqfap guh gezcwz, fanzdwg gij saehhangh hungnaek nangqdaengz leih’ik cungqvunz, cungj aeu ndeindei dingq gij yigen gak fuengmienh, baudaengz gij yigen baebingz. Sojmiz hongsaeh yinzminz cwngfuj cungj aeu daejyienh gij eiqnyienh yinzminz, guh ndaej ndei mbouj ndei aeu yawj saedsaeh yauqgoj、doeksat youz yinzminz daeuj bingz.
Cienzmienh gyagiengz cauhlaeb dangjfungh lenzcwng. Hawj gij hagsib gyauyuz“song hag it guh” bienqbaenz ciengzseiz bienqbaenz cidu bae, nyinhcaen haiguh gij cawjdaez gyauyuz“mbouj lumz simnyienh codaeuz、geiqmaenh diuzrap gwnzmbaq”. Laemxsim gvancez doeksaed gij cingsaenz Dangjcunghyangh bet hangh gvidingh caeuq gij banhfap ciengzsaeq saedhengz de, mboujduenh cingjcei“seiq yiengh rumzmbeuj”, daegbied dwg caenhrengz gaiqcawz hingzsiz cujyi、gvanhliuz cujyi bae. Gyagiengz saemjgeiq gamduk. Gyamaenh hwngfat aen seiqdaeuz fanj nduknaeuh doucwngh lanzdangj mbouj ndaej haenx, gyaeng gienz haeuj aen loengz cidu bae, laemxsim fadceih gak cungj hingzveiz nduknaeuh. Boux guhhong ndaw cwngfuj aeu genseuq gaghaed, gaenxguh caenh cizcwz, gagrox bae ciepsouh faplwd gamduk、gamcaz gamduk caeuq beksingq gamduk, nseuq vih beksingq guhsaeh, baenzlawz cungj doiq ndaej hwnj aen cwngheuh bouxhoiq yinzminz.
Cienzmienh daezsang cwngfuj yauqnaengz. Hawj cwngfuj ndalaeb gihgou caeuq boiqceiq ciznwngz bienq ndei bae, gyalaeg gihgou gaijgwz, cauxbaenz aen dijhi cwngfuj ceihleix cizcwz mingzbeg doekdingh、ciuqfap hengzsawj gienzlig, demgiengz gij ligliengh goengsaenq caeuq gij ligliengh caephengz cwngfuj. Sojmiz gij cingzcik Cungguek gaijgwz hwngfat aeundaej, cungj dwg guh okdaeuj. Doiq gak gaep cwngfuj caeuq boux guh hong de daeuj gangj, vih beksingq guh saeh dwg doi mbouj ndaej、mbouj guh dwg mbouj caenh cwzyin. Aeu laebndei aen gihci gikcoi hanhhaed、cinjhawj sawq loek gaij loek, geiz hauh sienmingz dwk vih boux gaenx guh saeh cengjhwet gya rengz, yiemzsuk gyaepcaz gij cwzyin gik guh、rubrab guh gij saeh goenggya. Baenzlawz cungj mbouj ndaej hanbak lai sing goksax、cix guh noix doeksaed yaez, baenzlawz cungj mbouj hawj ciemq vih mbouj guhsaeh. Gyoengq ganbu aeu daezsang cwngci suciz caeuq gij bonjsaeh guhhong, gouz caen guh saed, gamj bae guh saeh, guh ok gij niebcik moq saedsaedcaihcaih daeuj, guh ok cungqvunz haibak haenh ndei daeuj, guh ok aen geizseiq sengdoengh baenz cien baenz fanh diuz ruz nyigrumz yaengx fan, bonghbae fofo daeuj.
Gak boux daibyauj！
Cunghvaz Minzcuz dwg aen gyadingz hung doxndei caemhyouq、doxcomz raeujrub ndeu. Raeuz aeu genhciz caeuq guhndei aen cidu dieg minzcuz gag guenj, cienzmienh gvancez gij minzcuz cwngcwz aen Dangj. Laebdaeb roengzrengz daemxcengj dieg minzcuz、gij minzcuz vunz haemq noix de hwngfat. Cujciz ndei gij hozdung angqhoh Gvangjsih Bouxcuengh Swcigih、Ningzya Veizcuz Swcigih laebbaenz 60 hopbi. Gyagiengz gak minzcuz dox baedauq、dox gyaulouz、dox yungzhab, hawj aen cingjdaej caezcaemh Cunghvaz Minzcuz giekdaej engq maenh、doxlienz engq ndaet.
Raeuz aeu cienzmienh gvancez diuz gihbwnj fuengcim hongsaeh cunghgyau aen Dangj, genhciz aen fuengyiengq hawj cunghgyau hab gij saedsaeh guek raeuz, coicaenh cunghgyau gvanhaeh cangqheiq huzndei, hawj boux vunz mizmingz cunghgyaugai caeuq gyoengq vunz saenq cunghgyau de youq ndaw coicaenh ginghci sevei hwngfat fazveih cozyung ndei.
Raeuz aeu nyinhcaen doeksaed gyauzvu cwngcwz, henhoh gij gienzik habfap gyauzbauh rog guek caeuq gveihgyauz gyauzgen, cauh ok diuzgen engq ndei hawj gyoengqde youq ndaw guekgya yendaiva gensez fatok gijndei daegbied caeuq cozyung youqgaenj engq lai, gikcoi gyoengq lwglan Cunghvaz ndawguek rogguek doengzcaez haenqrengz buekguh、caez cauh cingzcik ronghsag.
Gak boux daibyauj！
Naj doiq aen bienqvaq laegdaeuq yiengh vanzging guekgya ancienz, raeuz aeu doenggvaq aen muzbyauh hawj bingdoih bienq ak seizdaih moq Dangj raeuz daeuj dazyinx, laebmaenh doekdingh aeu aen swhsiengj hawj bingdoih bienq ak Siz Ginbingz bae dazyinx cauhlaeb gozfangz caeuq bingdoih, giendingh mbouj bienq byaij diuz roen hawj bingdoih bienq ak miz gij daegsaek Cungguek, cienzmienh doicaenh gij hongsaeh lienhbing bwh hoenx, laemxsim mizrengz bae henhoh gij cawjgienz、ancienz、leih’ik hwngfat guekgya. Genhciz gij gaenbonj yenzcwz caeuq cidu Dangj baenzbaenz cungj aeu lingjdauj bingdoih, cienzmienh haeujlaeg gvancez aen cidu ginhveij cujsiz fucwz. Laebdaeb doidoengh gaijgwz gozfangz caeuq bingdoih, cauhlaeb gij yienhdaih fuengzhen henz guek、gwnz haij、gwnz mbwn giengzdaih onjmaenh de. Laebndei aen dijhi gozfangz dungyenz, gyagiengz cienzminz gozfangz gyauyuz. Henhoh gij gienzik habfap bouxbing dem vunz ndawranz de, sawj bouxbing baenz aen cizyez daengx biengz gingqcungh. Haeujlaeg hengzguh aen canloz ginh minz yungzhab hwngfat, haeujlaeg gaijgwz gozfangz gohgi gunghyez. Gak gaep cwngfuj aeu yungh gij guhfap engq mizrengz de, bae daemxcengj gaijgwz cauhlaeb gozfangz caeuq bingdoih, haeujlaeg mbeguh gij hozdung yungjhu bingdoih daihndei gij vunz ndaw ranz bouxbing、yungjhu cwngfuj ndiepgyaez beksingq, hawj ginh cwng ginh minz doxgiet seizseiz cungj genq lumj rinranx、itcig rag laeg mbaw mwn.
Gak boux daibyauj！
Raeuz aeu laebdaeb cienzmienh cinjdeng bae gvancez aen fuengcim“aen guekgya ndeu song cungj cidu”, dawzyiemz eiciuq Fapgoek caeuq Gihbwnjfaz banhsaeh. Aeu caenhrengz daemxcengj Yanghgangj、Aumwnz Daegbied Hingzcwnggih cwngfuj caeuq hingzcwng cangjgvanh eifap bae yungh gienz, haenqrengz hwngfat ginghci、lienzdaemh gaijndei gij gwndaenj lwgminz、miz bouhloh bae doicaenh minzcuj、coicaenh ndawbiengz huzndei. Daemxcengj Yanghgangj、Aumwnz yungzhaeuj aen daihbuenz guekgya hwngfat bae, gyalaeg Diegndaw caeuq dieg Gangj Au gyaulouz gapguh. Dou saenq, Yanghgangj、Aumwnz itdingh ndaej caeuq Diegndaw guekcoj caemh hwngfat、caez mwnhoengh.
Raeuz aeu laebdaeb gvancez gij fuengcim cwngcwz hungnaek mizgven hongsaeh Daizvanh, genhciz diuz yenzcwz aen Cungguek dog, youq gwnz giekdaej“gij nyinhrox doxdoengz 92 nienz”, doidoengh song hamq gvanhaeh hozbingz hwngfat, doicaenh yamqdin guekcoj hozbingz doengjit. Laemxsim henhoh cawjgienz guekgya caeuq diegguek caezcingj, baenzlawz cungj mbouj yungznyaenx miz yiengh maeuzsuenq caeuq hengzdoengh faenmbek“Daizvanh gaglaeb”lawz. Gya’gvangq song hamq ginghci vwnzva gyaulouz gapguh, cugbouh vih gyoengq beixnuengx Daizvanh youq Diegndaw hagsib、cauhnieb、couhnieb、gvaq saedceij daezgung gij dakdaih caeuq gyoengq beixnuengx Diegndaw doxdoengz. Song hamq caemh rag, goetyiet doxlienz.Gyoengq beixnuengx song hamq swnh’wngq aen byaijyiengq lizsij、caez rap dauhleix hung minzcuz, ietdingh yaek doengzcaez cauh’ok aen ngoenzcog gyaeundei Cunghvaz Minzcuz dauqhwng hungmbwk！
Gak boux daibyauj！
Cungguek caeuq seiqgyaiq gak guek hwngfat gaenjmaed doxlienz、minghyinh caemh haemz caemh hoj. Raeuz yaek itcig mbouj bienq bae byaij diuzroen hozbingz hwngfat, doidoengh laebhwnj cungj gozci gvanhaeh yienghmoq. Gaenxmaenx caeuqfaenh gaijgwz guhndei ceihleix seiqgyaiq, haenqrengz bae cauhlaeb yiengh seiqgyaiq ginghci hailangh de. Doicaenh guek hung doxbang gapguh, gyalaeg caeuq guekgya seiqhenz huzndei caemhyouq、caezcaemh hwngfat, gyagiengz caeuq gij guekgya cingqcaih hwngfat haenx doxgiet gapguh. Banhndei vaigyauh cawjciengz, lumjbaenz Bozauz Yacouh Lundanz Nenzvei、Sanghaij Gapguh Cujciz Funghvei、Cungh Feih Gapguh Lundanz Funghvei daengj. Laebdaeb vih gaijgez gij vwndiz vunzlai gvansim gwnz gozci caeuq digih, fazveih gij cozyung aen guek hung raphwnj cwzyin. Gyagiengz caeuq laebndei aen dijhi baujcang leih’ik rog guek ancienz. Cungguek nyienh caeuq gak guek itheij, vih doidoengh cauhlaeb aen cingjdaej caemh minghyinh vunzloih bae buek guh mboujdingz！
Gak boux daibyauj！
Doxgiet couh ndaej gietcomz ligliengh, saedguh couh ndaej cauh ok daengzcog. Raeuz aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh gyangsim, yaengx sang fan geiz hungmbwk yiengh sevei cujyi miz gij daegsaek Cungguek, aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx, laemxsim baenaj, lauxsaed guhhong, coicaenh ginghci sevei lienzdaemh cangqheiq hwngfat, vih guhcaez gij yinvu cienzmienh hwnqbaenz aenbiengz siujgangh、roengzrengz ceng’aeu yiengh sevei cujyi miz gij daegsaek Cungguek seizdaih moq ndaej dabdaengz muzdiz yawhgeiz, vih dawz guek raeuz hwnqbaenz aen yendaiva guekak sevei cujyi fouqmiz minzcuj vwnzmingz huzciz gyaeundei bae、guhbaenz aen loqsiengj Cungguek—— Cunghvaz Minzcuz daih fukhwng caiq guh ok gunghawj！
